கோவை மாவட்டத்தி்ல் தற்போது வெயிலின் தாக்கம் அதிகரித்து காணப்படுவதால், கடும் வெப்பம் நிலவி வருகிறது. நாளுக்கு நாள் வெயிலின் தாக்கம் அதிகரித்த வண்ணம் உள்ளது.

கோடை வெயிலுக்கு இதமாக குளிர்ச்சியான குடிநீர் வழங்கும் மண்பானைகள் விற்பனையும் அதிகரித்து வருகிறது.

கோவை மேட்டுப்பாளையம் சாலையில் மண்பானைகள் உற்பத்தி மற்றும் விற்பனை செய்வோர் நவீன வரவுக்கு ஏற்ப பானைகளில் எளிதாக குடிநீர் பிடிக்க குழாய் பொருத்தி  விற்பனை செய்கின்றனர்.

இதுகுறித்து மண்பானை விற்பனையாளர்கள் கூறியதாவது; முன்பைவிட மண்பாண்டங்களுக்கு மக்களிடையே வரவேற்பு அதிகரித்துள்ளது. கோடை வெயிலின் வெப்பம் அதிகரித்துள்ளதால் மண் பானைகளை வாங்க அதிக மக்கள் ஆர்வம் காட்டி வருகின்றனர்.

ஆனால் அதனை உற்பத்தி செய்ய போதுமான மண் கிடைப்பதில்லை. இதனால், ஒவ்வொரு ஆண்டும் தொழில் நலிவடைந்து வருகிறது. மேலும் தற்போது மண்பானைகளுக்கு தேவை அதிகரித்து இருந்தாலும் இந்த தொழிலை செய்ய யாரும் முன்வருவதில்லை.

எனவே மண் பாண்டங்கள் செய்ய போதுமான மண் கிடைக்க மாவட்ட நிர்வாகம் நடவடிக்கை எடுக்க வேண்டும்.

கடந்த காலங்களில் போதுமான மண் கிடைத்து வந்த நிலையில், தற்போது  மண் தட்டுப்பாடு அதிகரித்து விட்டது. இதனால் மண்பாண்டங்கள் செய்யும் தொழில் நலிவடைந்துள்ளது.

மண் எடுக்க அனுமதி இருந்தும், பானைகள் தயாரிக்க மண் அள்ள முடியாத நிலை உள்ளது.  இதே நிலை தொடர்ந்தால், மண்பானைகளுக்கு தட்டுப்பாடு ஏற்படும் எனவும், மண்பாண்டங்கள் உற்பத்தி செய்ய முடியாது. வரும் காலங்களில் மண்பாண்டங்கள் தயாரிக்க எங்களுக்கு போதுமான மண் கிடைக்க அரசு  நடவடிக்கை எடுக்க வேண்டும் என்றார்.

செய்தி: பி.ரஹ்மான், கோவை மாவட்டம்

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“

க.சண்முகவடிவேல்

Perambalur: பெரம்பலூர் மாவட்டம் கிருஷ்ணாபுரம் பகுதியைச் சேர்ந்த குழந்தைவேல். இவர் அரிசி ஆலை நடத்தி வந்துள்ளார். இவரது மகன் சக்திவேல் தனது தந்தையிடம் தனக்குரிய சொத்தை பிரித்து தருமாறு அடிக்கடி கேட்டு தகராறு செய்துள்ளார். குழந்தைவேல் சொத்தை பிரித்துக் கொடுக்க மறுக்கவே, அவரது மகன் சக்திவேல் கடந்த பிப்ரவரி மாதம் 16 ஆம் தேதி தனது தந்தையை வீட்டு வாசலில் வைத்து பலமாக தாக்கினார். 

இதில் பலத்த காயமுற்ற குழந்தைவேல் திருச்சியில் உள்ள பிரபல தனியார் மருத்துவமனையில் தீவிர சிகிச்சைக்காக சேர்க்கப்பட்டார். இந்த சம்பவம் தொடர்பாக கைகளத்தூர் போலீசார் வழக்கு பதிவு செய்து விசாரணை செய்தனர். தந்தை மகனுக்குமான பிரச்சனை, குடும்ப விவகாரம், சமாதான உடன்படிக்கை ஏற்படுத்திக் கொள்கிறோம் என உறவினர்கள் சொன்னதால் இருவரிடமும் எழுதி வாங்கிக்கொண்டு அந்த வழக்கை முடித்து வைத்தனர். திருச்சி மருத்துவமனையில் சிகிச்சையில் இருந்த குழந்தைவேல் சிகிச்சை முடிந்த பிறகு நலமுடன் வீடு திரும்பியவர் மன உளைச்சலில் இருந்திருக்கின்றார். 

இந்த நிலையில், குழந்தைவேல் கடந்த 18 ஆம் தேதி வீட்டில் இறந்து கிடந்திருக்கின்றார். இதுகுறித்து போலீசாருக்கு தகவல் தெரிவிக்கப்பட்ட நிலையில், போலீசார் பிரேதத்தை கைப்பற்றி விசாரணை செய்ததில், அவரது மரணம் இயற்கை மரணம் என்பதை உறுதி செய்த பின்பு போலீசார் அவரது உறவினர்களிடம் விசாரணை செய்தனர். அதன் பின்பு குடும்ப வழக்கப்படி அவரது இறுதி காரியங்கள் நடை பெற்றாலும், வழக்கு நிலுவையில் இருந்தது.

இந்த சூழலில், அரிசி ஆலை அதிபர் குழந்தைவேலுவை அவரது மகன் கொடூரமாக தாக்கும் வீடியோ காட்சி சமூக ஊடகங்களில் தற்போது வைரலாகி வருகிறது. இதனையடுத்து, கைகளத்தூர் போலீசார் அவரது மகன் சக்திவேலுவை கைது செய்து தீவிர விசாரணை மேற்கொண்டு வருகின்றனர். அதேபோல், இயற்கை மரணம் என்ற வழக்கையும் கொலை வழக்காக மாற்றி விசாரணையைத் தொடங்கியுள்ளனர். 

கடந்த பிப்ரவரி 16 ஆம் தேதி நடந்த இந்த தாக்குதல் தொடர்பான வீடியோ அவர் இறந்த பிறகு தற்போது சமூக ஊடகங்களில் வைரலாகியதால் சக்திவேல் கைது செய்யப்பட்டு இருக்கிறார் என்பது குறிப்பிடத்தக்கது. 

I understand this happened in February in Perambalur Dt. No FIR registered then because family refused to give one. Later on, when the video surfaced FIR was filed, and now the son has also been arrested. Cause of death is also being investigated. https://t.co/Ef7spSXXMY

— Sriram (@SriramMadras) April 25, 2024

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற  https://t.me/ietamil“

கிளாம்பாக்கத்திலிருந்து விழுப்புரம், கள்ளக்குறிச்சி, கடலூர், சிதம்பரம், விருத்தாச்சலம், திருவண்ணாமலை, போளூர் பகுதிகளுக்கு 450 அரசு பஸ்கள் இயக்கப்படும் என,  தமிழ்நாடு அரசு போக்குவரத்து கழகம் விழுப்புரம் அறிவித்துள்ளது

இது குறித்து விழுப்புரம் தமிழ்நாடு அரசு போக்குவரத்து கழகத்தின் மேலாண் இயக்குநர் வெளியிட்டுள்ள செய்தி குறிப்பு;

வார இறுதி நாட்களான 26.04.2024 (வெள்ளிக்கிழமை) மற்றும் 27.04.2024 (சனிக்கிழமை)  மக்கள் கிளாம்பாக்கத்திலிருந்து விழுப்புரம், கள்ளக்குறிச்சி, கடலூர், சிதம்பரம், விருத்தாச்சலம், திருவண்ணாமலை, மற்றும் போளூர் ஆகிய ஊர்களுக்கு அதிக அளவில் பயணம் செய்வார்கள் என்பதால் அதற்கு ஏதுவாக விழுப்புரம் அரசு போக்குவரத்துக் கழகம் சார்பாக கூடுதலாக வெள்ளிக்கிழமை 200, சனிக்கிழமை 250,  மொத்தம் 450  சிறப்பு பேருந்துகளை மேற்கண்ட வழித்தடங்களில் இயக்க ஏற்பாடு செய்யப்பட்டுள்ளது.

எனவே, பயணிகள் https://www.tnstc.in என்ற இணையதளம் மூலம் முன்பதிவு செய்து இச்சிறப்பு பேருந்துகளை பயன்படுத்திக் கொள்ளலாம்.

மேலும், பயணிகள் அடர்வு குறையும் வரை தேவைக்கு ஏற்ப பேருந்துகளை ஏற்பாடு செய்திடவும், பேருந்து இயக்கத்தினை மேற்பார்வை செய்திடவும் அதிகாரிகள் பணி அமர்த்தப்பட்டு உள்ளனர்.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“

தெற்கு ரயில்வே சார்பில் நான்காவது தண்டவாளம் அமைக்கும் பணிகளால் சென்னை ரிசர்வ் வங்கி சுரங்கப்பாதை ஏப்ரல் 26-ம் தேதி முதல் 3 மாதத்திற்கு ஒருவழிப்பாதையாக மாற்றம் செய்யப்படுகிறது என்று அறிவிக்கப்பட்டுள்ளது. 

இது குறித்து வெளியிடப்பட்டுள்ள செய்திக் குறிப்பில் அறிவித்திருப்பதாவது: “தெற்கு ரயில்வே துறை சார்பாக ரிசர்வ் வங்கி சுரங்கப்பாதை பாலத்தில் நான்காவது ரயில் இருப்புப் பாதை வழித்தடம் அமைக்கும் பணி நடைபெற உள்ளதால் சுரங்கப் பாதையில் செல்லும் வாகன போக்குவரத்தில் மாற்றம் செய்யப்படுகிறது.  26.04.2024 இரவு 10 மணி (ரயில்வே நேரம் 22) முதல் 3 மாத காலத்திற்கு ரிசர்வ் வங்கி சுரங்கப்பாதை ஒரு வழி பாதையாக பின்வரும் செயல்பாட்டிற்கு வரும்:

*ராயபுரம் பாலம் மற்றும் ராஜாஜி சாலையிலிருந்து காமராஜர் சாலையை நோக்கி செல்லும் அனைத்து வாகனங்களும் ரிசர்வ் வங்கி சுரங்கப்பாதையில் (போர் நினைவிடம் நோக்கி) அனுமதிக்கப்படாது. அதற்கு பதிலாக அவை ரிசர்வ் வங்கி சுரங்கப்பாதை அணுகு சாலை - வடக்கு கோட்டை சாலை (NFS Road) - ஆர்.ஏ. மன்றம் - முத்துசாமி சாலை டாக்டர் முத்துசாமி பாலம்  - வாலாஜா பாயிண்ட் கொடி மர சாலை- போர் நினைவுச் சின்னம் வழியாக காமராஜர் சாலையை அடையலாம்.

*காமராஜர் சாலையிலிருந்து பாரிமுனை நோக்கி வரும் வாகனங்கள் ரிசர்வ் வங்கி சுரங்கப்பாதை வழியாக வழக்கம் போல் இயக்கப்படும். 

அனைத்து வாகன ஓட்டிகளும் ஒத்துழைப்பு நல்குமாறு கேட்டுக்கொள்ளப்படுகிறது” என்று அறிவிக்கப்பட்டுள்ளது.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“

திருச்சியில் தமிழ்நாடு அளவில் 50க்கும் மேற்பட்ட  விவசாய சங்கங்களின் நிர்வாகிகள் பங்கேற்ற அவசர ஆலோசனைக் கூட்டம் மூத்த விவசாயிகள் சங்க தலைவர் மகாதானபுரம் ராஜாராமன் தலைமையில் நடைபெற்றது. இதற்கான ஏற்பாட்டினை தமிழ்நாடு காவிரி விவசாயிகள் சங்கத்தின் பொதுச் செயலாளரும் போராட்டக் குழு தலைமை ஒருங்கிணைப்பாளருமான 
பிஆர் பாண்டியன் ஏற்பாடு செய்திருந்தார். 
கூட்டத்தில் ராஜாராமன் பேசுகிறபோது:

50 ஆண்டு காலமாக மேகதாட்டு அணை கட்ட கர்நாடக எடுத்த முயற்சிகளை விவசாயிகள் போராட்டத்தால் தடுத்து நிறுத்தப்பட்டு வருகிறது. இந்நிலையில் தற்போது சட்டவிரோதமாக மெகதாட்டு அணையை கட்டி தமிழ்நாட்டை அழிப்பதற்கு நடவடிக்கையை தடுத்து நிறுத்த வேண்டிய பெரும் பொறுப்பு விவசாயிகளுக்கு உள்ளது.

விவசாயிகள் சங்கத்தின் சார்பில் வழக்கும் உச்ச நீதிமன்றத்தில் போடப்பட்டுள்ளது.  கர்நாடகம் மேகதாட்டு அணை கட்டுமான பணியை தடுத்து நிறுத்த கோரி அனைத்து விவசாயிகளும் உச்ச நீதிமன்ற தலைமை நீதிபதிக்கு அவசர கடிதம் அனுப்ப வேண்டும். அதற்கான முதல் கடிதத்தை இன்று அனுப்பி வைக்கிறோம் என்றார். 
தொடர்ந்து செய்தியாளர்களிடம் பேசிய  பி.ஆர். பாண்டியன், காவிரி நீரை நம்பி டெல்டா மாவட்டங்களில 22 லட்சம் ஏக்கர் சாகுபடி  பெறுகிறது. 

மேலும், சென்னை உட்பட 12 மாநகராட்சிகளை உள்ளடக்கிய 32 மாவட்டங்களில் வாழக்கூடிய ஐந்து கோடி மக்களின் குடிநீர் ஆதாரமாக காவிரி நீர் விளங்குகிறது. இந்நிலையில் கடந்த பிப்ரவரி 1ஆம் தேதி நடைபெற்ற காவிரி மேலாண்மை ஆணைய கூட்டத்தில் சட்ட விரோதமாக மத்திய அரசு பிரதிநிதிகள் மேகதாட்டு அணை கட்டுவதற்கு அனுமதி கோரி மத்திய அரசை வலியுறுத்தி தீர்மானம் நிறைவேற்ற கேட்டுக் கொண்டதின் அடிப்படையில் ஆணையம் தீர்மானம் நிறைவேற்றி உள்ளது. 

சட்டவிரோதமாக செயல்படும் கர்நாடக அரசுக்கு துணை போகும் மத்திய மாநில அரசுகளை கண்டித்தும் உடனடியாக தடுத்து நிறுத்த கோரியும் வரும் மே 2ல் தஞ்சாவூர் காவிரி கண்காணிப்பு பொறியாளர் அலுவலகத்தை முற்றுகையிட்டு போராட்டம் நடத்த முடிவு எடுக்கப்பட்டது.

இப்போராட்டத்தில் பலஆயிரத்துக்கு மேற்பட்ட விவசாயிகள் தமிழகம் முழுமையிலிருந்தும் கலந்து கொள்ள உள்ளனர். தொடர் போராட்டங்களை தீவிரப்படுத்த 15 பேர் கொண்ட காவிரி மேகதாட்டு அணை எதிர்ப்பு போராட்டக் குழு அமைக்கப்பட்டுள்ளது.

அடுத்த கட்ட போராட்டத்தை தஞ்சாவூரில் அறிவிப்போம். தொடர்ந்து போராட்டத்தை தீவிரப் படுத்துவோம்.
மேலும் காவிரி பாசனத்தை ஒழுங்குபடுத்த 11 தீர்மானங்கள் தமிழ்நாடு அரசு வலியுறுத்தி நிறைவேற்றப்பட்டுள்ளது என்றார்.
கூட்டத்தில் பி.ஆர். பாண்டியன் தலைமை ஒருங்கிணைப்பாளராகவும்.தென்னிந்திய நதிகள் இணைப்பு சங்க தலைவர் பி அய்யாக்கண்ணு. மகாதானபுரம் 

ராஜாராமன்,ஸ்ரீரங்கம் பாலு தீட்சதர், திருமணிமுத்தாறு பாசன விவசாயிகள் சங்க தலைவர் சேலம் தங்கராஜ்.தமிழ்நாடு விவசாயிகள் முன்னேற்றக் கழகத்தின் தலைவர் நாமக்கல் பாலு, முல்லைப் பெரியாறு வைகை பாசன விவசாய சங்க கூட்டமைப்பின் ஒருங்கிணைப்பாளர் சிவகங்கைஆதிமூலம் நாகை எஸ். ஸ்ரீதர், தஞ்சாவூர் மாவட்ட விவசாய நல சங்க தலைவர் சின்னத்துரை, தெற்கு ராஜன் வாய்க்கால் பாசன சங்கத் தலைவர் சீர்காழி சீனிவாசன், வீராணம் ஏரி பாசன விவசாய சங்க பொறுப்பாளர்  மணிக்கொள்ளை ராமச்சந்திரன், கவுண்டம்பட்டி சுப்பிரமணியன்
உட்பட 15 பேரை நியமிக்க முடிவெடுக்கப்பட்டது.

தமிழ்நாடு அனைத்து விவசாய சங்கங்களின் ஒருங்கிணைப்பு குழுகௌரவ தலைவரும் திருமங்கலம் கால்வாய் பாசன சங்க தலைவருமான எம். ராமர்,தமிழ்நாடு காவிரி விவசாயி சங்கத்தின் தலைவர் பழனியப்பன்,மாநில துணைச் செயலாளர் செந்தில்குமார், தஞ்சாவூர் வடக்கு மாவட்ட தலைவர் என் செந்தில்குமார், தெற்கு மாவட்ட தலைவர் வி எஸ் வீரப்பன்,திருவாரூர் மாவட்ட செயலாளர் குடவாசல் சரவணன், கடலூர் மாவட்ட பொறுப்பாளர் சுரேஷ், மாநில இளைஞரணி தலைவர் மேலூர் அருண்.செயலாளர் மகேஸ்வரன்,வயலூர் ராஜேந்திரன்,எம் தெய்வமணி குடவாசல் நாகராஜன் உள்ளிட்ட நூற்றுக்கும் மேற்பட்ட பல்வேறு சங்கங்களின் நிர்வாகிகள் பங்கு கொண்டனர்.

செய்தி: க. சண்முகவடிவேல்

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“

Coimbatore | கோவை வெள்ளியங்கிரி மலையில் இருந்து வரும் நீரை நானா நானி என்ற முதியோர்கள் வசிக்கும் குடியிருப்பின் பயன்பாட்டிற்காக விதிமீறல் செய்து முறைகேடாக எடுத்து செல்வதாகவும், இது குறித்து குடியிருப்பு தரப்பில் அளிக்கப்பட்டுள்ள கடிதத்தின் உண்மை நிலை அறிக்கையை மாவட்ட ஆட்சியர் தர வேண்டி ஆட்சியரிடம் புதுக்காட்டு வாய்க்கால் நீர் பாசன விவசாயிகள் நல சங்கத்தினர் மனு அளித்தனர்.

இது குறித்து பேசிய  புதுக்காட்டு வாய்க்கால் நீர் பாசன விவசாயிகள் நல சங்க விவசாயிகள் , 2019ம் ஆண்டு நானா நானி என்ற கட்டுமான நிறுவனத்தின் விவசாய நிலத்துக்கு நீர் கொண்டு வர வெள்ளியங்கிரி அடிவாரத்தில் கிணறு வெட்டி நீர் கொண்டு செல்ல அவர்கள் அனுமதி வாங்கி இருந்தனர்.
அப்போதே அந்த அனுமதி தவறு என கூறி உயர் நீதிமன்றத்தில் தாங்கள் வழக்கு தொடர்ந்தோம்.  அந்த வழக்கு தங்களுக்கு சாதகமாக வந்து, அவர்கள் போட்டுள்ள  பைப் லைன்களை  எடுக்க நீதிமன்றம் கூறியது.

பின்னர் குடியிருப்பின் உரிமையாளர்  போலி கடிதம் ஒன்றை தாசில்தாரிடம் அளித்ததாக நீதிமன்றத்தில் அளித்தனர்.
இந்நிலையில் அந்த கடிதத்தின் உண்மை அறிக்கையை அளிக்குமாறு மாவட்ட ஆட்சியரிடம் மனு அளித்துள்ளதாக கூறினர். 
மேலும், அவர்களின் இந்த செயலால்  அப்பகுதி விவசாயிகள் அனைவரும் பாதிக்கப்படுவோம் எனவும் மக்களுக்கும் குடிநீர் இன்றி தவிப்பார்கள் எனவும் கூறினர்.

நொய்யல் ஆற்றங்கரை ஓரமாகவே கிணறு வெட்டி போர்வேல் போட்டுள்ளார்கள் எனவும் அதற்கான அனுமதியெல்லாம் விதிமுறைகளுக்கு முரணாக பெற்றுள்ளதாக குற்றம் சாட்டினர்.
தொடர்ந்து, அப்பகுதியில் பைப் லைன் போடுவதற்கு விவசாயிகளுக்கே அனுமதி வழங்கப்படுவதில்லை என்ற நிலையில் இவர் விவசாயி என்று கூறி அனுமதி பெற்று பைப் லைன் போட்டுள்ளதாக தெரிவித்தனர்.

இதனை ரத்து செய்ய வேண்டும் என நீதிமன்றம் உத்தரவு அளித்துள்ளதாகவும் அந்த உத்தரவின் மீது அவர் அப்பீல் செய்துள்ளார் எனவும் இந்நிலையில் மாவட்ட ஆட்சியர் உண்மை அறிக்கை தருவதாக கூறியுள்ளார் என கூறினர். 
குடியிருப்பிற்காக நொய்யல் ஆற்றை கடந்து 8 இஞ்ச் பைப் போட்டுள்ளார்கள் எனவும் விவசாயிகளுக்கே 2 இஞ்ச் பைப் தான் அனுமதி அளிக்கப்படுகிறது எனவும் தெரிவித்தனர். 

இது குறித்து மாவட்ட ஆட்சியரிடம் கடிதம் அளித்துள்ளதாக அவர்கள் கூறுகிறார்கள், ஆனால் மாவட்ட ஆட்சியர் அவ்வாறு எந்த கடிதமும் வரவில்லை என்கிறார் என தெரிவித்தனர்.
அவரது குடியிருப்புகளுக்கு தண்ணீர் கொண்டு செல்வதற்காக ஆற்றை ஒட்டி கிணறு வெட்டி நீர் எடுப்பதாகவும் இதன் மூலம் சுமார் 4000 ஏக்கர் பாசன விவசாய நிலங்கள் பாதிக்கப்படும் எனவும் அங்கு நிலத்தடி நீரும் போய்விடும் என கூறினர்.

செய்தியாளர் பி ரஹ்மான்

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற  https://t.me/ietamil“

க.சண்முகவடிவேல்

Trichy: திருச்சி  நீதிமன்றம் அருகே மாநகராட்சி தொடக்கப்பள்ளி ஒன்று செயல்பட்டு வருகின்றது. இங்கு 100-க்கும் மேற்பட்ட சிறுவர்-சிறுமிகள் பயின்று வருகின்றனர். இந்த பள்ளியின் தலைமை ஆசிரியராக இருக்கும் அம்சவல்லி மற்றும் பள்ளி ஊழியர்கள் நேற்று புதன்கிழமை மாலை வழக்கம்போல் பள்ளியை பூட்டி விட்டு வீடு சென்றனர்.

இந்த நிலையில், இன்று காலை வழக்கமாக பள்ளியை திறக்க வாட்ச்மேன் வந்து பார்த்தபோது பள்ளியின் பூட்டு உடைக்கப்பட்டிருந்தது. இதனைக் கண்டு அதிர்ச்சியடைந்த அவர் இதுகுறித்து தலைமை ஆசிரியருக்கு தகவல் கொடுத்தார். இதன் பின்னர், தலைமை ஆசிரியை பள்ளிக்கு வந்து உள்ளே சென்று பார்த்தபோது, தலைமை ஆசிரியை அறையில் பீரோக்கள் உடைக்கப்பட்டிருந்தது. 

பீரோவில் இருந்த ரூ. 25 ஆயிரம் ரொக்கம் மற்றும் சிறுவர் சிறுமியரின் விளையாட்டு பொருட்கள், மின் விசிறிகள் திருடப்பட்டு இருந்தன. நூலகத்திலும் பொருட்கள் சிதறி கிடந்தன. இதுகுறித்து தலைமை ஆசிரியை அம்சவல்லி திருச்சி அரசு பொதுமருத்துவமனை வளாகத்தில் உள்ள காவல் நிலையத்தில் புகார் கொடுத்தார். அதன்பேரில் போலீஸார் விரைந்து வந்து தீவிர விசாரனை நடத்தி அப்பகுதியில் உள்ள சி.சி.டி.வி கேமராக்களை ஆய்வு செய்து வருகின்றனர்.

பள்ளியின் வாசலில் இரவு நேரங்களில் சில சமூக விரோத கும்பல்கள் அங்கே அமர்வதும், மது அருந்துவதும் அவ்வப்போது நடைபெற்று வருவதாகவும், இதுகுறித்து ஏற்கனவே பள்ளி சார்பிலும், அப்பகுதியினர் சார்பிலும் காவல் நிலையத்தில் புகார் கொடுத்திருந்த நிலையில், இன்று பூட்டு உடைக்கப்பட்டு பொருட்கள் கொள்ளையடிக்கப்பட்டிருக்கும் சம்பவம் அப்பகுதியில் பெரும் பரபரப்பை ஏற்படுத்தியிருக்கின்றது.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற  https://t.me/ietamil“

க.சண்முகவடிவேல்

Trichy: திருச்சி மாவட்டம், முசிறி வட்டம், தாத்தையங்கார் பேட்டை, பில்லாதுரை கிராமத்தைச் சேர்ந்தவர் வேணுகோபால் மகன் ஜானகிராமன் (வயது.79), இவர் சார்பதிவாளராக பணிபுரிந்தவர். 1989-1993 காலக் கட்டத்தில் துறையூர், உறையூர், முசிறி, அட்டுவம்பட்டடி, வில்பட்டி, கொடைக்கானல் ஆகிய முக்கிய இடங்களில் சார்பதிவாளராக பொறுப்பு வகித்துள்ளார். 

இந்த இடைப்பட்ட காலத்தில் மேற்கண்ட இடங்களில் இவர் பணிபுரிந்தபோது, அவரது வருமானத்திற்கு அதிகமாக சட்டவிரோதமான வகையில் இவரது பெயரிலும், இவரது மனைவி வசந்தி (வயது65) பெயரிலும் வாங்கிக் குவித்த சொத்துக்களின் அப்போதைய மதிப்பு ரூ.32,25,532/- (ரூபாய் முப்பத்தி இரண்டு லட்சத்து இருபத்தி ஐந்தாயிரத்து ஐநூற்றி முப்பத்தி இரண்டு மட்டும்) 98% ஆகும்.

இந்நிலையில் வருமானத்திற்கு அதிகமாக சொத்து சேர்த்ததன்பேரில், கடந்த 17.08.2001 அன்று அப்போதைய திருச்சி ஊழல் தடுப்பு மற்றும் கண்காணிப்புப்பிரிவில் காவல் ஆய்வாளர் அம்பிகாபதி என்பவர் மூலம் வழக்கு தொடுக்கப்பட்டது. இந்த வழக்கின் புலன் விசாரணை முடித்து, குற்றப்பத்திரிக்கை தாக்கல் செய்யப்பட்டது. நீதிமன்றத்தில் சாட்சிகள் விசாரணையில் இருந்து வந்த வழக்கின் தொடர் விசாரணையை தற்போதைய காவல் துணை கண்காணிப்பாளர் மணிகண்டன், சிறப்பு அரசு வழக்குறைஞர் சுரேஷ்குமார், காவல் ஆய்வாளர் சேவியர்ராணி மற்றும் உதவி ஆய்வாளர் பாஸ்கர் ஆகியோர்களால் நடத்தப்பட்டு வந்தது.

இந்நிலையில், வருமானத்திற்கு அதிகமாக சொத்து சேர்த்த இந்த வழக்கின், விசாரணை முடிவுற்று இன்று (25.04.2024) திருச்சி ஊழல் தடுப்பு மற்றும் சிறப்பு நீதிமன்ற நீதிபதி கார்த்திகேயன்  தீர்ப்பு வழங்கினார். அதில், குற்றம் சாட்டப்பட்ட ஜானகிராமன் மற்றும் அவரது மனைவி வசந்தி ஆகிய இருவருக்கும் தலா 5 ஆண்டு கடுங்காவல் தண்டனையும், தலா பத்தாயிரம் ரூபாய் அபராதமும் விதிக்கப்பட்டது. வருமானத்திற்கு அதிகமாக சேர்க்கப்பட்ட சொத்துக்களை பறிமுதல் செய்து அரசுக்கு ஒப்படைக்குமாறும் அதிரடியாக தீர்ப்பளித்து உத்தரவிடப்பட்டது 

சார்பதிவாளர் ஜானகிராமன், அவரது பெயரிலும், அவரது மனைவி வசந்தி பெயரிலும் வில்பட்டி மற்றும் கொடைக்கானல் பகுதியில் வாங்கிய சொத்தின் தற்போதைய மதிப்பு மட்டும் சுமார் ரூ.100 கோடிக்கும் மேலாகும் என தெரிய வருகிறது.

சார்பதிவாளர் மீது கொடுக்கப்பட்ட சொத்துக்குவிப்பு  வழக்கில் திறமையாக சாட்சியங்களை நீதிமன்றத்தில் தாக்கல் செய்த டி.எஸ்.பி மணிகண்டன் மற்றும் திறமையாக வாதாடி குற்றவாளிகளை சிறைக்குத் தள்ளிய அரசு வழக்கறிஞரையும் சமூக ஆர்வலர்கள் பாராட்டி வருகின்றனர்.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற  https://t.me/ietamil“

Coimbatore | சமவெளியில் மிளகு சாகுபடி செய்வது 100 சதவீதம் சாத்தியம் என்பதை நிரூபிக்கும் விதமாக ஒரே நாளில் 4 இடங்களில் மிளகு சாகுபடி கருத்தரங்கு நடக்க இருப்பதாக காவேரி கூக்குரல் இயக்கத்தின் கள ஒருங்கிணைப்பாளர் தமிழ்மாறன் தெரிவித்துள்ளார்.

சமவெளியில் மிளகு சாகுபடி செய்வது 100 சதவீதம் சாத்தியம் என்பதை நிரூபிக்கும் விதமாக, காவேரி கூக்குரல் இயக்கம் சார்பில் மிளகு சாகுபடி கருத்தரங்கு ஏப்ரல் 28-ம் தேதி ஒரே நாளில் தமிழ்நாட்டில் 4 இடங்களில் நடைபெற உள்ளது.
புதுக்கோட்டையில் நடைபெறும் கருத்தரங்கை சுற்றுச்சூழல் மற்றும் காலநிலை மாற்ற துறை அமைச்சர் மெய்யநாதன் சிறப்பு விருந்தினராக பங்கேற்று தொடங்கி வைக்க உள்ளார்.

இது தொடர்பான பத்திரிகையாளர் சந்திப்பு கோவை பிரஸ் கிளப்பில் நடைபெற்றது. இதில் காவேரி கூக்குரல் இயக்கத்தின் கள ஒருங்கிணைப்பாளர் தமிழ்மாறன் செய்தியாளர்களிடம் கூறியதாவது.
மலைப்பிரதேசங்களில் மட்டுமே மிளகு சாகுபடி செய்ய முடியும் என பெரும்பாலான விவசாயிகள் எண்ணி கொண்டு இருக்கின்றனர். ஆனால், சமவெளியிலும் மிளகு சாகுபடி செய்து அதில் லாபம் எடுக்க முடியும் என்பதை நாங்கள் எங்களுடைய கள அனுபவத்தின் மூலம் கண்டறிந்துள்ளோம்.

புதுக்கோட்டை, கடலூர், மயிலாடுதுறை உள்ளிட்ட மாவட்டங்களில் உள்ள முன்னோடி விவசாயிகள் பல ஆண்டுகளாக மிளகு சாகுபடியை சமவெளியில் வெற்றிகரமாக செய்து வருகின்றனர்.

சில விவசாயிகள் ஒரு ஏக்கருக்கு மிளகில் இருந்து மட்டும் ஆண்டுக்கு ரூ.6 லட்சம் வருமானம் ஈட்டி வருகின்றனர். வேறு எந்த ஊடுப்பயிருலும் இந்தளவுக்கு அதிக லாபம் எடுக்க முடியாது. மேலும், சில விவசாயிகள் வெளிநாடுகளுக்கும் ஏற்றுமதி செய்து வருகின்றனர்.

இவற்றை எல்லாம் நேரில் ஆய்வு செய்த பிறகு காவேரி கூக்குரல் இயக்கம் சமவெளியில் மிளகு சாகுபடி செய்யும் பயிற்சியை கடந்த 7 ஆண்டுகளாக அளித்து வருகிறது.

இதன் தொடர்ச்சியாக, இம்மாதம் ஏப்ரல் 28-ம் தேதி தமிழ்நாட்டில் ஒரே நாளில் 4 இடங்களில் சமவெளியில் மிளகு சாகுபடி செய்வது குறித்த விரிவான கருத்தரங்கை ஏற்பாடு செய்துள்ளோம்.
கோவை, புதுக்கோட்டை, மயிலாடுதுறை மற்றும் கடலூர் என 4 மாவட்டங்களில் உள்ள முன்னோடி விவசாயிகளின் மிளகு தோட்டங்களில் இக்கருத்தரங்குகள் நடைபெற உள்ளன.

இதில் பல்வேறு மாவட்டங்களைச் சேர்ந்த முன்னோடி விவசாயிகள், தமிழ்நாடு, கேரளா, கர்நாடகா ஆகிய மாநிலங்களைச் சேர்ந்த வேளாண் விஞ்ஞானிகள் பங்கேற்று மிளகு ரகங்களை தேர்ந்தெடுப்பதில் தொடங்கி, அதை நட்டு பராமரிக்கும் வழிமுறைகள், அறுவடை செய்யும் முறைகள், விற்பனை மற்றும் ஏற்றுமதி வாய்ப்புகள் என பல விஷயங்கள் குறித்து விரிவாக பேச உள்ளனர். 
குறிப்பாக, போடியில் உள்ள இந்திய நறுமணப் பயிர்கள் வாரியத்தின் துணை இயக்குநர் சிமந்தா சைக்கியா, கர்நாடகாவில் உள்ள ICAR - IISR நிறுவனத்தின் முதன்மை விஞ்ஞானி டாக்டர் முகமது பைசல், தமது மிளகு ரகங்களுக்கு காப்புரிமை பெற்றுள்ள முன்னோடி விவசாயிகள் திரு. டி.டி. தாமஸ், கே.வி.ஜார்ஜ் உட்பட பலர் பங்கேற்று பேச உள்ளனர்.

இதுமட்டுமின்றி, பண்ணை பார்வையிடல் நிகழ்ச்சியின் மூலம் விவசாயிகள் தங்களுடைய பல்வேறு சந்தேகங்களை நேரில் பார்த்தும் கேட்டும் தெரிந்து கொள்ள முடியும் என தெரிவித்தார்.

செய்தியாளர் பி. ரஹ்மான்

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற  https://t.me/ietamil“

நடிகரும், இந்திய ஜனநாயக புலிகள் கட்சியின் தலைவருமான மன்சூர் அலிகான் காங்கிரஸ் கட்சியில் இணைய விருப்பம் தெரிவித்து இன்று கடிதம் கொடுத்துள்ளார்.

நடிகர் மன்சூர் அலிகான் இந்திய ஜனநாயக புலிகள் என்ற பெயரில் கட்சி தொடங்கினார். இருப்பினும் கட்சிக்கு தேர்தல் ஆணையம் அங்கீகாரம் வழங்காததால் சுயேட்சை வேட்பாளராக போட்டியிட்டு வந்தார். தற்போது நடந்து முடிந்த மக்களவைத் தேர்தலில் வேலூர் தொகுதியில் பலாப்பழ சின்னத்தில் சுயேட்சை வேட்பாளராகப் போட்டியிட்டார். 

இந்த நிலையில்,  சென்னை சத்யமூர்த்தி பவனில் தமிழக காங்கிரஸ் தலைவர் செல்வப்பெருந்தகையை இன்று (ஏப்ரல் 25) மன்சூர் அலிகான் சந்தித்துப் பேசினார். இந்த சந்திப்பின் போது ராகுல் காந்தி முன்னிலையில் காங்கிரஸ் கட்சியில் சேர விருப்பம் தெரிவித்து கடிதம் கொடுத்துள்ளார்.

அதோடு இந்திய ஜனநாயக புலிகள் கட்சியை காங்கிரசுடன் இணைக்க கோரியும் விண்ணப்பம் அளித்துள்ளார். அதன்பின் செய்தியாளர்களிடம் பேசிய  மன்சூர் அலிகான், காங்கிரஸ் கட்சியில் இணைவதற்கு கடிதம் கொடுத்துள்ளேன். முதலில் காங்கிரஸ் கட்சியில் தான் இருந்தேன். மீண்டும் தாய் கட்சியில் இணைய உள்ளேன். இந்திய ஜனநாயக  புலிகள் கட்சியை காங்கிரசுடன் இணைக்க முடிவு செய்துள்ளேன். பிரதமர் மோடி 10 ஆண்டுகளாக எதுவும் செய்யவில்லை. அவரை ஒரு சாதாரணக் குடிமகனாக கைது செய்து திகார் சிறையில் அடைக்க வேண்டும் என்று கூறினார். 

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற  https://t.me/ietamil“

கோவை தெற்கு வட்டாட்சியர் அலுவலகம் முன்பு பீப்புள் ஆஃப் அண்ணாமலை (People of Annamalai) என்ற இயக்கத்தின் சார்பில் மக்களவை தேர்தலில் வாக்காளர் பட்டியலில் பெயர் இல்லாதது கண்டித்து மாவட்ட தேர்தல் அதிகாரியும் மற்றும் தமிழக தேர்தல் ஆணையத்தை கண்டித்து ஆர்ப்பாட்டம் நடத்தப்பட்டது. இந்த ஆர்ப்பாட்டத்தில் கையில் பதாகைகள் வைத்து தேர்தல் ஆணையத்துக்கு எதிராக கோஷங்களை எழுப்பினர்.

பின்னர் செய்தியாளர்களை சந்தித்து பேசிய உறுப்பினர், மக்களவைத் தேர்தலில் வாக்காளர் பட்டியலில் பெயர் இல்லை. அதற்கு காரணம் தேர்தல் அதிகாரிகளும்,மாநகராட்சி அதிகாரிகளும் தான். கடந்த முறை உள்ளாட்சி தேர்தலில் வாக்கு செலுத்தும்போது வாக்காளர் பட்டியலில் பெயர் இருந்தது.ஆனால் இந்த முறை நீக்கிவிட்டனர்.

கவுண்டம்பாளையம் சட்டமன்ற தொகுதிக்கு உட்பட்ட ஒரு பூத்தில் 830 ஓட்டு காணவில்லை. இதற்கு தேர்தல் அதிகாரிகள் தீர்வு வழங்க வேண்டும். இது போல் கோவை மாவட்டத்தில் பல்வேறு பகுதிகளில் வாக்காளர்கள் பட்டியலில் வாக்காளர்கள் பெயர் இல்லை. வருகின்ற 2026-ம் ஆண்டு சட்டமன்றத் தேர்தலில் இதுபோல தவறு நடக்காமல் தேர்தல் அதிகாரிகள் முறையாக செயல்பட்டு விட்டுப் போன வாக்காளர்களை வாக்காளர் பட்டியலில் சேர்க்க வேண்டும் என்று வலியுறுத்தினர்.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற  https://t.me/ietamil“

கன்னியாகுமரி மாவட்டம் குலசேகரம் அருகே முள்ளம்பன்றி தாக்கிய ஆவேசத்தில் ஓடிய புலி காக்கச்சல் பகுதியில் ரப்பர் தோட்டத்தில் பால் வெட்டிகொண்டிருந்த தொழிலாளி மற்றும் இருசக்கர வாகனத்தில் வந்தவரை தாக்கிவிட்டு அருகில் உள்ள தோட்டத்தில் விழுந்து உயிரிழந்தது. 

கன்னியாகுமரி மாவட்டம் குலசேகரம் அருகே காக்கச்சல் ஸ்ரீதர்மசாஸ்தா ஆலயம் அருகில் இன்று காலை திடீரென புலி ஓன்று ஆவேசமான ஓடி வந்து, அப்பகுதி ரப்பர் தோட்டத்தில் பால் வெட்டிகொண்டிருந்த திருநந்திகரை பகுதி திட்டவிளையைச் சேர்ந்த பூதலிங்கம் (63) என்பவரை தாக்கியது. தொடர்ந்து சாலையில்  இருசக்கர வாகனத்தில் அன்னாசி பழத்தோட்டத்தில் வேலைக்கு  சென்றுக் கொண்டிருந்த ஆண்டிபொற்றை பகுதியை சேர்ந்த ஜெயன் (28) என்பவரை தாக்கியது. 

பின்னர் அந்தப் புலி அருகில் உள்ள தோட்டத்தில் விழுந்து உயிரிழந்தது. புலி தாக்கி படுகாயமடைந்த ரப்பர் பால் வெட்டும் தொழிலாளி பூதலிங்கம் மற்றும் ஜெயன் ஆகியோரின் கூக்குரல் கேட்டு ஓடி வந்த அக்கம்பக்கத்தினர் இருவரையும் மீட்டு குலசேகரம் அரசு மருத்துவமனைக்கு அனுப்பிவைத்தனர். 

படுகாயமடைந்த பூதலிங்கத்தை மேல் சிகிச்சைக்காக மார்த்தாண்டம் தனியார் மருத்துவமனைக்கு கொண்டு சென்றனர். தொடர்ந்து தகவலறிந்து சம்பவ இடத்திற்கு வந்த குலசேகரம் வனத்துறையினர்  தொழிலாளிகளை தாக்கி, உயிரிழந்த புலியை ஆய்வு செய்ததில் சுமார் 15 வயதுடைய பெண் புலி, முள்ளம் பன்றியை தாக்கிவிட்டு உடலில் முள்பட்டு படுகாயத்துடன் ஓடி வந்த ஆவேசத்தில் தொழிலாளியை தாக்கிவிட்டு உயிரிழந்திருக்கலாம் என முதற்கட்ட தகவலை தெரிவித்தனர்.

தொடர்ந்து உயிரிழந்த புலியை மீட்டு உடற்கூறாய்வுக்காக கொண்டு சென்ற வனத்துறையினர் தொடர்ந்து விசாரணை  மேற்கொண்டு வருகின்றனர். குடியிருப்பு பகுதியில் முள்ளம்பன்றியை தாக்கிவிட்டு புலி உயிரிழந்த சம்பவம் அப்பகுதி மக்களை அச்சத்தில் ஆழ்த்தியுள்ளது.

த.இ.தாகூர்., கன்னியாகுமரி

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“

திருச்சி விமான நிலையத்திற்கு வெளிநாடுகளில் இருந்து அதிக அளவில் விமானங்கள் இயக்கப்பட்டு வருகிறது. குறிப்பாக சிங்கப்பூர், மலேசியா, துபாய் உள்ளிட்ட நாடுகளுக்கு அதிக அளவில் விமானங்கள் இயக்கப்பட்டு வருகிறது.

இந்த விமானங்களில் வரும் பயணிகள் தங்கத்தை மறைத்து எடுத்து வருவது தொடர் கதையாக இருந்து வருகிறது. கடந்த சில நாட்களாக குறைந்து இருந்த தங்கம் கடத்தல், சமீபமாக மீண்டும் அதிகரித்துள்ளது.

இந்த நிலையில் திருச்சி விமான நிலையத்திற்கு சிங்கப்பூரிலிருந்து ஏர் இந்தியா எக்ஸ்பிரஸ் விமானம் வந்தது. இந்த விமானத்தில் வந்த பயணிகளை சுங்கத்துறை அதிகாரிகள் சோதனை செய்து கொண்டிருந்தனர்.

அப்போது ஆண் பயணி ஒருவரின் நடத்தையில் சந்தேகம் அடைந்த அதிகாரிகள், அவரை தனியே அழைத்து சென்று சோதனை செய்தனர்.

அப்போது அவர் தனது காலணியின் அடிப்பகுதியில் ரூ.28.86 லட்சம் மதிப்பிலான 401.5 கிராம் தங்கத்தை மறைத்து எடுத்து வந்தது தெரியவந்தது.

இதனை தொடர்ந்து அதனை பறிமுதல் செய்த அதிகாரிகள், அந்த பயணியை கைது செய்து அவரிடம் தொடர் விசாரணை மேற்கொண்டு வருகின்றனர்.

அதேபோல் இன்று அதிகாலை திருச்சி விமான நிலையத்திற்கு சிங்கப்பூரிலிருந்து வந்த இண்டிகோ ஏர்லைன்ஸ் விமானத்தில் வந்த பயணிகள் உடைமைகளை சுங்கத்துறை அதிகாரிகள் சோதனையிட்டனர்.

அப்போது புதுக்கோட்டையைச் சேர்ந்த ராஜேந்திரன் என்ற பயணி தனது (ஜட்டி) உள்ளாடையில் பேஸ்ட் வடிவில் மறைத்து கடத்தி வந்த 460 கிராம் எடையுள்ள, 33 லட்சத்து 15 ஆயிரத்து 600 ரூபாய் மதிப்புள்ள தங்கத்தை பறிமுதல் செய்தனர். பின்னர் இது குறித்து வழக்கு பதிவு செய்து அந்த நபரிடம் சுங்கவரித்துறையினர் தீவிர விசாரணை செய்து வருகின்றனர்.

செய்தி: க.சண்முகவடிவேல்

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற  https://t.me/ietamil“

தமிழகத்தில் உள்ள முக்கியமான மணல் குவாரிகளில் அரசு நிர்ணயம் செய்த அளவைவிட கூடுதலாக மணல் அள்ளி சட்டவிரோதமாக விற்பனை செய்ததாகவும், மணல் ஒப்பந்த குவாரிகளில் கிடைத்த வருமானம் மூலம் சட்டவிரோத பணப் பரிமாற்றங்கள் நடந்ததாகவும் புகார் எழுந்தது.

இதன் அடிப்படையில், கடந்த ஆண்டு செப்டம்பர் மாதம் 12-ம் தேதி தமிழகம் முழுவதும் மொத்தம் 34 இடங்களில் அமலாக்கத் துறையினர் சோதனை நடத்தினர். இதில் பல்வேறு முக்கிய ஆவணங்களை கைப்பற்றினர்.

இதைத்தொடர்ந்து திருச்சி, தஞ்சாவூர், கரூர், அரியலூர் மற்றும் வேலூர் மாவட்ட ஆட்சியர்கள், மாநில நீர்வளத் துறையின் மூத்த அதிகாரிகள், ஓய்வு பெற்ற பொதுப்பணித் துறை பொறியாளர்கள் உள்ளிட்ட சிலருக்கு நேரில் ஆஜராக வேண்டும் என அமலாக்கத் துறை சம்மன் அனுப்பியது.

இதை ரத்து செய்யக் கோரி உயர் நீதிமன்றத்தில் தொடரப்பட்ட வழக்கில் இடைக்கால தடை விதித்த நிலையில், அமலாக்கத்துறை உச்ச நீதிமன்றத்தில் மேல்முறையீடு செய்தது. இதில் உச்ச நீதிமன்றம் அளித்த உத்தரவின் அடிப்படையில், மணல் குவாரி முறைகேடு தொடர்பாக 5 மாவட்ட ஆட்சியர்களுக்கு அமலாக்கத்துறை சம்மன் அனுப்பியது. இந்த நிலையில், சென்னை நுங்கம்பாக்கத்தில் உள்ள அமலாக்கத்துறை அலுவலகத்தில் திருச்சி, தஞ்சை, கரூர், அரியலூர், வேலூர் மாவட்ட ஆட்சியர்கள் 5 பேரும் இன்று காலை 10:30 மணிக்கு ஆஜராகினர். 

இந்த நிலையில் திடீரென விசாரணை இடத்தை அமலாக்க துறையினர் தற்போது மாற்றி இருக்கின்றனர். மாவட்ட ஆட்சியர்கள் ஐந்து பேரையும் இரண்டு கார்களில் அழைத்துக் கொண்டு வேறு இடத்திற்கு அமலாக்கத் துறையினர் தற்போது சென்று கொண்டிருக்கின்றனர். இதனால் அரசு அதிகாரிகள் மத்தியில் பரபரப்பு ஏற்பட்டுள்ளது.

முன்னதாக மணல் குவாரிகளில் நடத்தப்பட்ட ரெய்டில் திரட்டப்பட்ட ஆவணங்களின் அடிப்படையில் மேற்கண்ட ஐந்து மாவட்ட ஆட்சியர்களுக்கும் தொடர்பு உள்ளது என இ.டி அதிகாரிகள் குற்றம் சாட்டியது குறிப்பிடத்தக்கது. 

க.சண்முகவடிவேல்

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“

திருச்சியில் ஓடும் பேருந்திலிருந்து இருக்கை கழன்று, அதனுடன் சேர்ந்து நடத்துநரும் சாலையில் விழுந்து காயமடைந்தார். இதுதொடர்பாக அரசுப் போக்குவரத்துக் கழக பணிமனை மேலாளர் உள்ளிட்ட 3 பேர் பணியிடை நீக்கம் செய்யப்பட்டனர்.

திருச்சி மத்திய பேருந்து நிலையத்திலிருந்து கே.கே.நகருக்கு நேற்று முன்தினம் அரசு நகரப் பேருந்து புறப்பட்டது. அப்போது அந்தப் பேருந்தில், ஏற்கெனவே சேதமடைந்த நிலையில் இருந்த இருக்கையில் எடமலைபட்டி புதூரை சேர்ந்த நடத்துநர் முருகேசன்(54) அமர்ந்திருந்தார்.

இந்தப் பேருந்து மத்தியப் பேருந்து நிலையத்திலிருந்து கலையரங்கம் திருமண மண்டபம் வழியாகச் சென்று ஒரு திருப்பத்தில் திரும்பியபோது, சேதமடைந்த இருக்கை முழுவதும் கழன்றதில், பேருந்தின் முன்பக்க படிக்கட்டு வழியாக இருக்கையுடன் சேர்ந்து, நடத்துநர் முருகேசனும் சாலையில் விழுந்தார்.

இதில் அவருக்கு கை மற்றும் காலில் காயம் ஏற்பட்டது. பேருந்து பயணிகள் கூச்சலிட்டதால், ஓட்டுநர் பாஸ்கரன் பேருந்தை நிறுத்தி, காயமடைந்த நடத்துநர் முருகேசனை மீட்டு மருத்துவமனைக்கு அனுப்பி வைத்தார்.

வைரலான புகைப்படம்...

பின்னர், அந்தப் பேருந்தில் இருந்த பயணிகள், வேறு பேருந்து மூலம் அனுப்பி வைக்கப்பட்டனர். சேதமடைந்த பேருந்து, பணிமனைக்கு கொண்டு செல்லப்பட்டது. இதற்கிடையில், இது தொடர்பான புகைப்படம் சமூக வலைதளத்தில் வைரலானது.

இந்நிலையில், அரசுப் போக்குவரத்துக் கழக தீரன் நகர் கிளை பணிமனை மேலாளர் ராஜசேகர் உள்ளிட்ட 3 பேரை பணியிடை நீக்கம் செய்து அதிகாரிகள் உத்தரவிட்டுள்ளனர்.

க.சண்முகவடிவேல்

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற  https://t.me/ietamil“

தேசிய கல்விக் கொள்கை (NEP) 2020ஐ தமிழகத்தில் அமல்படுத்துவதற்கு எதிர்ப்பு தெரிவித்தும், பொது நல வழக்கிற்கு எதிராகவும் மனு தாக்கல் செய்ய இந்திய கம்யூனிஸ்ட் கட்சியின் மாநில செயலாளர் ஆர்.முத்தரசன் மற்றும் விடுதலை சிறுத்தைகள் கட்சி தலைவர் தொல். திருமாவளவன் ஆகியோருக்கு சென்னை உயர் நீதிமன்றம் அனுமதி அளித்துள்ளது.

பொதுநல மனுதாரர் அர்ஜுனன் இளையராஜா சார்பில் ஆஜரான வழக்கறிஞர் ஆர்.குருராஜ், தனது கட்சிகாரருக்கு இந்த மனுவில் எந்த ஆட்சேபனையும் இல்லை என வாதிட்டதையடுத்து, தலைமை நீதிபதி சஞ்சய் கங்காபூர்வாலா மற்றும் நீதிபதி சத்தியநாராயண பிரசாத் ஆகியோர் அடங்கிய முதல் டிவிஷன் பெஞ்ச், முத்தரசன் மற்றும் திருமாவளவன் தாக்கல் செய்த மனுக்களை ஏற்றது. 

மேலும், பொதுநல மனுவை அடுத்த ஜூலை 31-ஆம் தேதி விசாரணைக்கு பட்டியலிடவும் உயர் நீதிமன்றப் பதிவாளருக்கு பெஞ்ச் உத்தரவிட்டது.

அரசியல் காரணங்களுக்காகவும், இந்தி மற்றும் சமஸ்கிருதம் தமிழகத்தில் திணிக்கப்படும் தவறான பயம் காரணமாகவும் தேசிய கல்வி கொள்கை 2020ஐ செயல்படுத்த மாநில அரசு தயங்குவதாக குற்றம் சாட்டி 2022 இல் பொதுநல மனு தாக்கல் செய்யப்பட்டது. அதில், உச்ச நீதிமன்ற உத்தரவுகளின்படி, தேவையான மாற்றங்களுடன் மாநிலத்தில் தேசிய கல்வி கொள்கையை அமல்படுத்த வேண்டும் என்று வலியுறுத்தப்பட்டது.

அதேநேரம், தமிழக அரசு அதன் பதில் வாக்குமூலத்தில், தேசிய கல்விக் கொள்கை 2020ஐ செயல்படுத்துவது தமிழ்நாட்டு மக்களுக்கு பாதகமானது என்று கூறியது, ஏனெனில் 2035க்குள் நாடு முழுவதும் மொத்த சேர்க்கை விகிதம் 50 சதவீதத்தை அடைய வேண்டும் என்ற தேசிய கல்விக் கொள்கையின் வலியுறுத்தலைத் தாண்டி தமிழ்நாடு ஏற்கனவே 51.4% அடைந்துள்ளது என தமிழக அரசு சார்பில் வாதிடப்பட்டது.

2020 ஆம் ஆண்டுக்கான அகில இந்திய உயர்கல்வி ஆய்வறிக்கையின்படி, தேசிய சராசரியான 27.1% விட தமிழ்நாடு மிக உயர்ந்த மொத்த சேர்க்கை விகிதத்தைப் பெற்றுள்ளது என்பதை எடுத்துக்காட்டி, தமிழ்நாட்டின் கல்வி முறை நாட்டிலேயே சிறந்ததாக இருப்பதோடு மட்டுமல்லாமல், தேசிய கல்விக் கொள்கை 2020ஐ விட 15 ஆண்டுகளுக்கு முன்னதாகவும் உள்ளது என்று தமிழக அரசு கூறியது.

அதேநேரம், மத்திய கல்வி அமைச்சகம் உயர் நீதிமன்றத்தில் தேசிய கல்வி கொள்கை 2020ஐ செயல்படுத்துவது தொடர்பான சிக்கலை தமிழக அரசாங்கத்துடன் தொடர்ந்து பின்பற்றி வருவதாகவும், இதுவரை எடுக்கப்பட்ட முயற்சிகள் மற்றும் சாதனைகளைப் பகிர்ந்து கொள்ளுமாறு தமிழக அரசாங்கத்திடம் கோரி 2021 செப்டம்பர் 7 ஆம் தேதி கடிதம் எழுதப்பட்டதாகவும் தெரிவித்துள்ளது.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“

Arun Janardhanan 

பிரபல பரதநாட்டிய நடனக் கலைஞரும், நடன இயக்குனருமான ஷீஜித் கிருஷ்ணா, சென்னையில் உள்ள கலாக்ஷேத்ரா அறக்கட்டளையில் தங்கியிருந்தபோது, தம்மை பாலியல் வன்கொடுமை செய்ததாகக் கூறி, தற்போது 30 மற்றும் 40 வயதுடைய அவரது முன்னாள் மாணவர்கள் இருவர், சென்னை உயர் நீதிமன்றத்தை அணுகியதையடுத்து, சென்னை போலீஸார் ஷீஜித் கிருஷ்ணாவை திங்கள்கிழமை கைது செய்தனர். 

ஆங்கிலத்தில் படிக்க: Renowned Bharatanatyam dancer held for sexual abuse

கலாக்ஷேத்ரா அறக்கட்டளையில் இதேபோன்ற பாலியல் துன்புறுத்தல் வழக்கு பதிவாகி சரியாக ஒரு வருடத்திற்குப் பிறகு இந்த சம்பவம் முன்னுக்கு வந்துள்ளது. ஒரு வருடத்திற்கு முந்தைய பாலியல் வழக்கு பெரிய எதிர்ப்புகளைத் தூண்டியது மற்றும் மாணவர்களை பாலியல் துஷ்பிரயோகம் செய்ததாகக் கண்டறியப்பட்ட ஆசிரிய உறுப்பினர் ஹரி பத்மன் கைது செய்யப்படுவதற்கு வழிவகுத்தது. இந்த வழக்கில் கலாக்ஷேத்ரா அறக்கட்டளை இன்னும் ஒரு அறிக்கையை வெளியிடவில்லை.

இந்த வழக்கின் விசாரணையை நன்கு அறிந்த மூத்த போலீஸ் அதிகாரி ஒருவர் கூறுகையில், ஷீஜித் கிருஷ்ணா (51) இரண்டு நடன நிகழ்ச்சிகளுக்காக அமெரிக்கா செல்வதற்கு சில மணி நேரங்களுக்கு முன்பு, நீலாங்கரையில் உள்ள அவரது வீட்டில் இருந்து திங்கள்கிழமை கைது செய்யப்பட்டார். இந்த வழக்கு குறித்து சென்னையில் உள்ள அமெரிக்க துணைத் தூதரகத்திற்குத் தெரிவிக்கப்பட்டதாகவும், இனிமேல் அவரது விசாவில் ஏற்கனவே சில தடைகள் விதிக்கப்பட்டுள்ளதாகவும் அரசாங்க வட்டாரங்கள் தெரிவித்தன.

திங்கள்கிழமை காவலில் வைக்கப்பட்ட ஷீஜித் கிருஷ்ணா, மாஜிஸ்திரேட் நீதிமன்றத்தில் ஆஜர்படுத்தப்பட்டு புழல் சிறையில் அடைக்கப்பட்டார்.

"கடந்த ஆண்டு எதிர்ப்புகள் மற்றும் ஆசிரிய உறுப்பினர் ஒருவரைக் கைது செய்ததே, தற்போது இந்த இரண்டு பெண்களையும் நீதிமன்றத்தை அணுகத் தூண்டியது. அவர்களில் ஒருவர் சென்னையில் உள்ள ஒரு உளவியலாளரிடம் சிகிச்சை பெற்றுக் கொண்டிருந்தார், அவருடன் பாலியல் துன்புறுத்தல் சம்பவங்களைப் பகிர்ந்து கொண்டார். உளவியலாளர் அந்தப் பெண்ணை சட்ட உதவியைப் பெறுமாறு பரிந்துரைத்து அவரை ஒரு வழக்கறிஞரிடம் அனுப்பினார். பின்னர் அவர்கள் சென்னை உயர் நீதிமன்றத்தை அணுகினர்” என்று போலீஸ் அதிகாரி கூறினார்.

சென்னை உயர்நீதிமன்றத்தின் உத்தரவுப்படி நீலாங்கரை அனைத்து மகளிர் போலீஸார் இந்த ஆண்டு தொடக்கத்தில் முதற்கட்ட விசாரணையைத் தொடங்கினர். "நாங்கள் வீடியோ கான்பரன்சிங் மூலம் புகார்தாரர்களிடம் விசாரணை நடத்தினோம், பிப்ரவரியில் அதிகாரப்பூர்வமாக வழக்கு பதிவு செய்யப்பட்டது" என்று அந்த அதிகாரி கூறினார்.
தி இந்தியன் எக்ஸ்பிரஸ் அணுகிய புகாரின் விவரங்கள், ஷீஜித் கிருஷ்ணா, பெண்களின் அப்பாவித்தனம் மற்றும் பாலியல் எல்லைகள் குறித்த விழிப்புணர்வின்மையைப் பயன்படுத்தி, தந்தைவழி பாசம் என்ற போர்வையில் தனது துஷ்பிரயோகத்தைத் தொடங்கியதாகக் கூறப்படுகிறது.

ஷீஜித் கிருஷ்ணா தந்தையின் அன்பு போன்ற போர்வையில் அடிக்கடி "ஒப்புதல் இல்லாத முத்தம் மற்றும் தொடுதல்" அல்லது நடனக் கற்பித்தலின் ஒரு பகுதியாக தொடுதல் மூலம் துன்புறுத்தியுள்ளார், மேலும், அவர்களை சிறப்பு வாய்ந்த/ தேர்ந்தெடுக்கப்பட்டவர்களாக குறிப்பிட்டு, அதன் மூலம் அவர்களின் உணர்ச்சிகளைக் கையாண்டுள்ளார்.

கலாக்ஷேத்ரா கல்லூரி வளாகம் மற்றும் ஊழியர் குடியிருப்புகளில் பல சம்பவங்கள் நடந்ததாகவும், ஷீஜித் கிருஷ்ணா துஷ்பிரயோகம் செய்ய தனிப்பட்ட இடங்களை அணுகியதாகவும் புகார் ஒன்று கூறுகிறது என்று போலீஸ் அதிகாரி கூறினார்.

15 வயதில், அந்தப் பெண்ணின் விருப்பத்திற்கு எதிராக ஷீஜித் கிருஷ்ணா எப்படி பாலியல் செயல்களில் ஈடுபடச் செய்தார் என்பதும், அவர் படுக்கையில் தள்ளி பாலியல் பலாத்காரம் செய்த சம்பவம் உட்பட, மெட்ராஸ் உயர் நீதிமன்றத்தில் தாக்கல் செய்யப்பட்ட ஒரு புகாரில் குறிப்பிடப்பட்டுள்ளது.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“

மாநிலம் முழுவதும் வெயில் வாட்டி வதைத்து வரும் நிலையில், தமிழ்நாடு செவ்வாய்கிழமை 40.5 மில்லியன் யூனிட் சூரிய மின் உற்பத்தி நுகர்வுகளை பதிவு செய்தது.

”ஏப்ரல் 23 அன்று தமிழ்நாடு எப்போதும் இல்லாத அளவிற்கு, 40.50 MU சூரிய மின்சாரத்தைப் பயன்படுத்தியுள்ளது. இது 13-மார்ச் - 2024 அன்று பதிவு செய்யப்பட்ட 39.90 MU என்ற முந்தைய சாதனையை முறியடித்துள்ளது. இதேபோல், நேற்றைய தின சூரிய மின் உற்பத்தி 5365 மெகாவாட்டும் அதிகமான ஒன்றாகும். 05-மார்ச்-2024 அன்று  செய்யப்பட்ட உற்பத்தியே 5398 மெகாவாட், மிக அதிக பட்ச சூரிய உற்பத்தியாகும்”, என்று தமிழ்நாடு மின்சார வாரியம் சமூக ஊடகங்களில் பதிவிட்டுள்ளது.

தமிழ்நாடு நேற்று (23-ஏப்ரல்-2024) சாதனை அளவிலான 40.50 MU சூரிய மின்சாரத்தைப் பயன்படுத்தியுள்ளது. இது 13-மார்ச் - 2024 அன்று பதிவு செய்யப்பட்ட 39.90 MU என்ற முந்தைய சாதனையை முறியடித்துள்ளது. இதேபோல், நேற்றைய தின சூரிய மின் உற்பத்தி 5365 மெகாவாட்டும் அதிகமான ஒன்றாகும்.… pic.twitter.com/c0DFrV3Y1v

— TANGEDCO Official (@TANGEDCO_Offcl) April 24, 2024

நிறுவப்பட்ட சூரிய திறன் அதிகரிப்பு மற்றும் நீடித்த பகல்நேரம் உள்ளிட்ட காரணிகள், சூரிய ஆற்றல் உற்பத்தி அதிகரிப்பதற்கு, காரணம் என்று தமிழ்நாடு மின்சார வாரிய அதிகாரிகள் கூறினார்கள்.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற  https://t.me/ietamil“

பெட்ரோல், டீசல் விலை

சென்னையில் பெட்ரோல், டீசல் விலையில் எந்த மாற்றமுமில்லை. இன்று சென்னையில் ஒரு லிட்டர் பெட்ரோல் லிட்டருக்கு ரூ.100.75 காசுகளாகவும், டீசல் விலை லிட்டருக்கு ரூ. 92.34 காசுகளாவும் விற்பனை செய்யப்படுகிறது.

ஏரிகளின் நீர் நிலவரம் 

சென்னைக்கு குடிநீர் வழங்கும் செம்பரம்பாக்கம், புழல், பூண்டி, சோழவரம், கண்ணன்கோட்டை ஆகிய 5 ஏரிகளில் 58.66% நீர் இருப்பு உள்ளது. செம்பரம்பாக்கம் - 65.87%, புழல் - 87.88%, பூண்டி - 32.9%,  சோழவரம் - 13.41%, கண்ணன்கோட்டை - 77.6% ஆக நீர் இருப்பு உள்ளது. 

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற  https://t.me/ietamil“

கோவை, தீத்திபாளையம் அரசு பள்ளி மாணவர்கள் மூன்று பேர் பெருமாள் கோவில் பதியில் உள்ள முண்டந்துறை தடுப்பணியில் குளிக்கச் சென்ற போது நீச்சல் தெரியாமல் உயிரிழந்த சம்பவம் அப்பகுதியில் சோகத்தை ஏற்படுத்தி உள்ளது.

கோவை, காருண்யா நகர் காவல் நிலைய சரகம் பெருமாள் கோவில்பதி  கிராமம் முண்டாந்துறை ஆறு தடுப்பணையில் குளிப்பதற்காக பச்சாபாளையம் திருவள்ளுவர் காலனியைச் சேர்ந்த தீத்திபாளையம் அரசு மேல் நிலைப் பள்ளி 12 ஆம் வகுப்பு மாணவர்கள்  1)பிரவீன்  2) கவின்  3) தக்க்ஷன்  மற்றும் சஞ்சய்  ஆகிய 4 பேரும் சென்று குளித்து உள்ளனர். 40 அடி ஆழம் உள்ள தடுப்பணையில் தற்போது 15 அடி நீர் உள்ளது.
இதில் நீச்சல் தெரியாமல் பிரவீன், கவின், தக்ஷன் ஆகிய 3 பேரும் நீரில் மூழ்கி இறந்து உள்ளனர்.  இது குறித்து காருண்யா நகர் காவல் துறை மற்றும் தீயணைப்பு, மீட்பு துறையினருக்கு  தகவல் தெரிவிக்கப்பட்டது.  

சம்பவ இடத்திற்கு வந்த காவல்துறை மற்றும் தீயணைப்புத் துறையினர் 3 பேரின் உடல்களை மீட்டு ஆம்புலன்ஸ் மூலமாக கோவை அரசு மருத்துவமனைக்கு உடல் கூறு ஆய்வுக்காக அனுப்பி வைக்கப்பட்டது.  

இதுகுறித்து காருண்யா நகர் காவல் துறையினர் வழக்கு பதிவு செய்து விசாரணை மேற்கொண்டு வருகின்றனர்.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“

Madras High Court | 1976 ஆம் ஆண்டு தமிழ்நாடு பொது வளாகங்கள் (அங்கீகரிக்கப்படாத ஆக்கிரமிப்பாளர்களை வெளியேற்றுதல்) சட்டத்தின் கீழ் வக்ஃப் சொத்துக்களை கொண்டு வந்த 2010 ஆம் ஆண்டு திருத்தம் அரசியலமைப்பிற்கு முரணானது என்று சென்னை உயர்நீதிமன்றம் அறிவித்துள்ளது.

தொடர்ந்து, தமிழ்நாடு வக்ஃப் வாரியத்தின் தலைமை நிர்வாக அதிகாரிக்கு (CEO) உத்தரவிட அதிகாரம் அளித்தது.
தலைமை நீதிபதி சஞ்சய் வி. கங்காபூர்வாலா மற்றும் நீதிபதி டி. பாரத சக்கரவர்த்தி ஆகியோர் 2010 ஆம் ஆண்டு மாநில சட்டமன்றத்தால் செய்யப்பட்ட திருத்தம் மத்திய சட்டமான 1995 ஆம் ஆண்டின் வக்ஃப் சட்டத்திற்கு எதிரானது என்று அறிவித்தனர்.

2013 ஆம் ஆண்டு மத்திய சட்டத்தில் செய்யப்பட்ட திருத்தத்தின்படி அமைக்கப்பட்ட வக்ஃப் தீர்ப்பாயங்கள் மூலம் மட்டுமே வக்ஃப் சொத்துகளை ஆக்கிரமிப்பவர்களை அகற்ற முடியும் என்று நீதிபதிகள் தெரிவித்தனர்.

மூத்த வழக்கறிஞர் வி. ராகவாச்சாரி மற்றும் எஸ்.ஆர் ஆகியோர் தலைமையிலான வழக்கறிஞர்களின் வாதத்தை நீதிபதிகள் ஏற்றுக் கொண்டனர்.
தொடர்ந்து, மாநில சட்டமும், மத்திய சட்டமும் இணைந்து செயல்படலாம் என்ற மாநில அரசின் வாதத்தை நீதிபதிகள் ஏற்க மறுத்துவிட்டனர்.

ஆகவே, வக்ஃப் சொத்துக்கள் அல்லது உரிமை தொடர்பாக சிக்கலான தகராறு இருந்தால், மத்திய சட்டத்தின் கீழ் தீர்ப்பாயத்தை அணுகலாம்.
தொடர்ந்து, தீர்ப்பை எழுதிய நீதிபதி சக்ரவர்த்தி, வக்ஃப் சொத்துக்களை ஆக்கிரமிப்பு அல்லது சட்டவிரோத ஆக்கிரமிப்பு ஆகியவற்றைக் கையாள்வதற்கு வக்ஃப் சட்டம், 1995 இன் அசல் விதிகள் போதுமானதாக இல்லை.

எனவே, பொது வளாகங்கள் (அங்கீகரிக்கப்படாத ஆக்கிரமிப்பாளர்களை வெளியேற்றுதல்) சட்டம், 1971 வக்ஃப் சொத்துக்களுக்கும் பயன்படுத்தப்பட வேண்டும் என்று சச்சார் கமிட்டி பரிந்துரைத்தது, ஏனெனில் இந்த சொத்துக்கள் பொதுமக்களின் நலனுக்காகவும் இருந்தன.

இந்தப் பரிந்துரையைத் தொடர்ந்து தமிழ்நாடு 2010ஆம் ஆண்டு திருத்தம் கொண்டு வந்தாலும், பல மாநிலங்கள் அவ்வாறு செய்யவில்லை.

எனவே, ஆக்கிரமிப்புகளை அகற்றுவதில் நாடு முழுவதும் ஒரே சீரான தன்மையை உறுதி செய்யும் வகையில், பார்லிமென்ட், 2013ல் வக்ஃப் சட்டத்தில் திருத்தம் செய்தது. 2013 ஆம் ஆண்டு திருத்தம் மத்திய சட்டத்தின் கீழ் பரிந்துரைக்கப்பட்ட நடைமுறைகளின்படி மட்டுமே வக்ஃப் சொத்துக்களை ஆக்கிரமிப்பவர்களை வெளியேற்ற முடியும் என்று தெளிவாகக் கூறப்பட்டுள்ளது.

மத்திய சட்டத்தில் 2013 திருத்தம் 2010 ஆம் ஆண்டு மாநில சட்டத் திருத்தத்தைத் தொடர்ந்து வந்ததால், மாநிலத் திருத்தம் பற்றி நாடாளுமன்றம் நன்கு அறிந்திருந்தும், அது 1995 ஆம் ஆண்டின் வக்ஃப் சட்டத்தை மனப்பூர்வமாகத் திருத்தியது என்று கருத வேண்டும்” என்று பெஞ்ச் கூறியது.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற  https://t.me/ietamil“

கரூரில் நடைபெற்ற குடிமராமத்து பணிகளை தடுத்ததாகவும், அரசு அதிகாரிகளை பணி செய்ய விடாமல் தடுத்ததாகவும் பதிவு செய்யப்பட்ட வழக்கில், அ.தி.மு.க முன்னாள் அமைச்சர் எம்.ஆர். விஜயபாஸ்கருக்கு சென்னை உயர் நீதிமன்றம் நிபந்தனையுடன் கூடிய முன் ஜாமீன் வழங்கி உத்தரவிட்டுள்ளது.

கரூரில் நடைபெற்ற குடிமராமத்து பணிகளை தடுத்ததாகவும், அரசு அதிகாரிகளை பணி செய்ய விடாமல் தடுத்ததாகவும் பதிவு செய்யப்பட்ட வழக்கில், முன்னாள் அமைச்சர் எம்.ஆர்.விஜயபாஸ்கர், முன் ஜாமின் கோரி சென்னை உயர் நீதிமன்றத்தில் மனுத்தாக்கல் செய்திருந்தார். 

இந்த வழக்கு கடந்த முறை விசாரணைக்கு வந்தபோது, 2022-ம் ஆண்டு முதல் முன்னாள் அமைச்சர் எம்.ஆர். விஜயபாஸ்கர் மீது நிலுவையில் உள்ள வழக்குகள் மற்றும் அதன் தற்போதைய நிலை பற்றி பதிலளிக்க காவல்துறைக்கு நீதிபதிகள் உத்தரவிட்டனர். 

இதைத் தொடர்ந்து, இந்த வழக்கு சென்னை உயர் நீதிமன்றத்தில் நீதிபதி ஜி.ஜெயச்சந்திரன் முன்பு மீண்டும் இன்று (24.04.20240 விசாரணைக்கு வந்தது. அப்போது காவல்துறை தரப்பில், முன்னாள் அமைச்சர் எம்.ஆர். விஜயபாஸ்கர் மீது 23 வழக்குகள் நிலுவையில் இருப்பதாகவும், அதில் சில வழக்குகள் ரத்து செய்யப்பட்டுவிட்டதாகவும், சில வழக்குகளின் விசாரணை நிலுவையில் இருப்பதாகவும்  தெரிவிக்கப்பட்டது. இதையடுத்து, முன்னாள் அமைச்சர் எம்.ஆர்.விஜயபாஸ்கருக்கு நிபந்தனையுடன் கூடிய முன் ஜாமின் வழங்கி நீதிபதி உத்தரவிட்டார். மேலும், மேலும், ஒரு லட்சம் ரூபாய்க்கான பிணைத் தொகை உத்தரவாதத்தை செலுத்தவும், விசாரணைக்கு தேவைப்படும் போது நேரில் ஆஜராகவும் உத்தரவிட்டார்.

முன்னதாக, அ.தி.மு.க முன்னாள் அமைச்சர் எம்.ஆர். விஜயபாஸ்கர் தன் மீது உள்ள 6 ஆறு வழக்குகளை ரத்து செய்யக்கோரி சென்னை உயர்நீதிமன்றத்தில் வழக்கு தொடர்ந்தார். அவர் மீது பதிவு செய்யப்பட்ட வழக்கு விவரங்கள்: கடந்த 2021-ம் ஆண்டு அ.தி.மு.க ஆண்டு விழாவின்போது கொரோனோ விதிகளை பின்பற்றாமல், பொதுமக்களுக்கு இடையூறு ஏற்படுத்தியதாக எம்.ஆர். விஜயபாஸ்கர் மீது பதிவு சேய்யப்பட்ட வழக்கு கரூர் மாவட்ட நீதிமன்றத்தில் நிலுவையில் இருந்தது.

அதேபோல், கடந்த 2022-ம் ஆண்டு வீட்டு வரி, மின்சார கட்டணம், பால் விலை உயர்வு ஆகியவற்றை கண்டித்து நடைபெற்ற ஆர்ப்பாட்டம் மற்றும் அதே ஆண்டில் அண்ணாவின் பிறந்த நாளை முன்னிட்டு பொதுக்கூட்டம் நடத்திய போது, சட்டவிரோதமாக ஒன்று கூடியதுடன், பொதுமக்கள் மற்றும் போக்குவரத்திற்கு இடையூறு ஏற்படுத்தியதாக பதியப்பட்ட வழக்கும் கரூர் மாவட்ட நீதிமன்றத்தில் நிலுவையில் இருந்தது. இப்படி பதிவு செய்யப்பட்ட ஆறு வழக்குகளையும் சென்னை உயர்நீதிமன்றம் கடந்த மார்ச் 12ம் தேதி ரத்து செய்து உத்தரவிட்டது குறிப்பிடத்தக்கது.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“

தமிழகத்தில் கோடை வெயில் தாக்கம் அதிகரித்துள்ள நிலையில் கோவை மாவட்டத்தில் பகல் 12 மணி முதல் 3 மணி வரை வெளியில் செல்வதை தவிர்த்திடுமாறு மாவட்ட ஆட்சியர் கிராந்திகுமார் பாடி அறிவுறுத்தி உள்ளார்.

இது குறித்து மாவட்ட ஆட்சியர் வெளியிட்டுள்ள அறிக்கையில்

"தமிழ்நாட்டில் கடந்த சில நாட்களாக பல்வேறு மாவட்டங்களில் வெப்பம் அதிகரித்து காணப்படும் நிலையில், இந்திய வானிலை ஆய்வு மையம் தனது 23.4.2024 நாளிட்ட அறிவிக்கையில், தமிழ்நாட்டின் வட உள் மாவட்டமான கோயம்புத்தூர் மாவட்டத்தில் வரும் நாட்களில் ஓரிரு இடங்களில் வெப்ப அலை வீசக்கூடும் என்று தெரிவிக்கப்பட்டுள்ளது.

எனவே பொதுமக்கள் போதுமான அளவு தண்ணீர் அருந்துமாறும், அத்தியாவசிய தேவையின்றி வெளியில் செல்வதை தவிர்க்குமாறும், குறிப்பாக நண்பகல் 12 மணி முதல் பிற்பகல் 3 மணி வரை வெளியில் செல்வதை தவிர்த்திடுமாறும், வெயிலின் தாக்கத்தால் உடல்நலக் குறைவு ஏற்படும் நிலையில், உடனடியாக மருத்துவரை அணுகுமாறும் இதன் மூலம் தெரிவித்துக் கொள்ளப்படுகிறது என குறிப்பிடப்பட்டுள்ளது.

பி.ரஹ்மான் கோவை மாவட்டம்.

நெல்லை தொகுதி பா.ஜ.க வேட்பாளர் நயினார் நாகேந்திரன், தி.மு.க மாவட்ட செயலாளர் அலுவலகத்தில் பணம் பறிமுதல் செய்யப்பட்டது தொடர்பாக அமலாக்கத்துறை விசாரணை கோரிய மனுவை சென்னை உயர் நீதிமன்றம் தள்ளுபடி செய்து உத்தரவிட்டது.

தமிழ்நாட்டில் நடந்து முடிந்த மக்களவைத் தேர்தலின்போது, திருநெல்வேலி தொகுதி பா.ஜ.க வேட்பாளர் நயினார் நாகேந்திரன் உதவியாளர்களிடம் இருந்து, சென்னை தாம்பரம் ரயில் நிலையத்தில் ரயிலில் எடுத்துச் செல்லப்பட்ட ரூ.3.99 கோடி பறிமுதல் செய்யப்பட்டது. 

அதே போல, தி.மு.க மாவட்டச் செயலாளர் அலுவலகத்தில் இருந்து ரூ.28.51 லட்சம் ரூபாய் பறிமுதல் செய்யப்பட்டது. இந்த பணம் பறிமுதல் செய்யப்பட்டது தொடர்பாக, அமலாக்கத்துறை இயக்குனரகம் விசாரணை நடத்த வேண்டும் என்று திருநெல்வேலி தொகுதியில் போட்டியிட்டுள்ள சுயேட்சை வேட்பாளர் ராகவன் சென்னை உயர் நீதிமன்றத்தில் மனு தாக்கல் செய்திருந்தார். 

அந்த மனுவில், வாக்காளர்களுக்கு விநியோகிக்க பணம் கொண்டு சென்றது என்பது சட்டவிரோத பணப் பரிமாற்றத் தடைச் சட்டத்தின் கீழ் குற்றம் என்பதால் இது சம்பந்தமாக அமலாக்கத்துறை இயக்குனரகம் விசாரணை நடத்த உத்தரவிட வேண்டும் என்று கோரிக்கை விடுத்திருந்தார்.

இந்த மனு சென்னை உயர் நீதிமன்றத்தில் நீதிபதிகள் எம்.எஸ். ரமேஷ், சுந்தர் மோகன் அடங்கிய அமர்வு முன்பு விசாரணைக்கு வந்தது. அப்போது, பணம் பறிமுதல் செய்யப்பட்டது தொடர்பான வழக்கு, சட்டவிரோதப் பணப்பரிமாற்றத் தடைச் சட்டத்தின் கீழ் பட்டியலிடப்பட்ட வழக்காக கருத முடியாது என்று அமலாக்கத்துறை தரப்பில் பதில் மனு தாக்கல் செய்யப்பட்டது. 

அமலாக்கத்துறை தரப்பு பதிலை பதிவு செய்துகொண்ட நீதிபதிகள், இந்த மனுவை தள்ளுபடி செய்வதாக விரிவான உத்தரவு பின்னர் பிறப்பிக்கப்படும் என்றும் தெரிவித்தனர். 

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“

பெட்ரோல், டீசல் விலை

சென்னையில் 38-வது நாளாக பெட்ரோல், டீசல் விலையில் மாற்றமில்லை. சென்னையில் ஒரு லிட்டர் பெட்ரோல் ரூ.100.75 காசுகளாகவும், டீசல் விலை லிட்டருக்கு ரூ.92.34 காசுகளாகவும் விற்பனை செய்யப்படுகிறது.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற  https://t.me/ietamil“

சீடிக்கள், பாடல் கேசட்டுகள் விற்பனை மூலம் வணிக ரீதியாக இளையராஜா பெற்ற தொகை யாருக்கு சொந்தம் ? என்று சென்னை உயர் நீதிமன்றம் கேள்வி எழுப்பி உள்ளது.

இசையமைப்பாளர் இளையராஜாவின் சுமார் 4  ஆயிரத்து 500 பாடல்களை பயன்படுத்துவதற்கு எக்கோ மற்றும் அகி உள்ளிட்ட இசைத்தட்டு  நிறுவனங்கள்  ஒப்பந்தம் செய்திருந்தன. ஒப்பந்தம் முடிந்த பிறகும், காப்புரிமை  பெறாமல் தனது பாடல்களை பயன்படுத்துவதாக கூறி இளையராஜா வழக்கு தொடர்ந்திருந்தார்.

இந்த வழக்கை விசாரித்த  சென்னை உயர்நீதிமன்றத்தின் இரு நீதிபதிகள் கொண்ட அமர்வு,  இளையராஜாவின் பாடல்களை பயன்படுத்த இசைதட்டு நிறுவனங்களுக்கு இடைக்கால தடை விதித்தது.

படத்தின் காப்புரிமை தயாரிப்பாளரிடம்  இருப்பதாகவும், அவர்களிடம் செய்த ஒப்பந்தத்தின் அடிப்படையில் பாடல்களை பயன்படுத்த  தங்களுக்கு அதிகாரம் இருப்பதாகவும் எக்கோ நிறுவனம் சார்பிலும் மேல்முறையீடு மனுதாக்கல் செய்யப்பட்டது.

ஏப்ரல் 17ம் தேதி இந்த வழக்கு விசாரணைக்கு வந்தபோது “ இளையராஜா எல்லோருக்கும் மேலானவர் என்று அவர் நினைப்பதை ஏற்க முடியாது ” என்று நீதிமன்றம் தெரிவித்தது. இந்நிலையில் இன்று இந்த வழக்கு மீண்டும் விசாரணைக்கு வந்தது.

” பாடல் வரிகள், பாடகர் அனைத்தும் சேர்த்து தான் பாடல் உருவாகிறது. வரிகள் இல்லை என்றால் பாடல் இல்லை என இருக்கும் போது, பாடலுக்கு பாடலாரிசியருக்கும் உரிமை  கோரினால்  என்ன ஆகும். பாடல் கேசட்டுகள், சிடிக்கள் விற்பனை மூலம் வணிக ரீதியாக  இளையராஜா பெற்ற தொகை யாருக்கும் சொந்தம்? என நீதிபதிகள் கேள்வி எழுப்பினர்.

வணிக ரீதியாக இளையராஜா  பெற்ற தொகை மேல்முறையீட்டு வழக்கின் இறுதித் தீர்ப்புக்கு கட்டுபட்டது எனவும் அறிவித்த நீதிபதிகள், இசையமைப்பு என்பது கிரியேட்டிவ் பணி என்பதால் காப்புரிமை  சட்டம் இதற்குப் பொருந்தாது என்று தெரிவித்துள்ளனர்.

அமைச்சர் பொன்முடி மீதான செம்மண் குவாரி முறைகேடு வழக்கு விசாரணையை வரும் 29 ஆம் தேதிக்கு ஒத்திவைத்து விழுப்புரம் மாவட்ட நீதிமன்றம் உத்தரவிட்டுள்ளது.

கடந்த 2006-11 தி.மு.க ஆட்சிக் காலத்தில் பொன்முடி அமைச்சராக இருந்தபோது அவரது மகன் கெளதம சிகாமணி மற்றும் உறவினர்கள், விழுப்புரம் மாவட்டம் பூத்துறை பகுதிகளில் உள்ள செம்மண் குவாரிகளில் சட்டவிரோதமாக அளவுக்கு அதிகமாக மண் எடுத்ததன் மூலம், அரசுக்கு ரூ.37 லட்சத்திற்கும் மேலான அளவிற்கு இழப்பு ஏற்படுத்தியதாக, அமைச்சர் பொன்முடி, அவரது மகன் கெளதம சிகாமணி மற்றும் உறவினர் ஜெயச்சந்திரன் உள்ளிடோர் மீது விழுப்புரம் காவல்துறையினர் வழக்குப்பதிவு செய்தனர்.

இந்த வழக்கை விழுப்புரம் மாவட்ட முதன்மை அமர்வு நீதிமன்றம் விசாரித்து வருகிறது. இவ்வழக்கில் குற்றம் சாட்டப்பட்ட லோகநாதன் ஏற்கனவே உடல்நலக்குறைவால் இறந்து விட்டார். இவ்வழக்கில் 67 பேர் அரசு தரப்பு சாட்சிகளாக சேர்க்கப்பட்டுள்ளனர். இவர்களில் இதுவரை 26 பேர் சாட்சியம் அளித்துள்ள நிலையில் 22 பேர் அரசு தரப்புக்கு பாதகமாக பிறழ் சாட்சியம் அளித்துள்ளனர். தொடர்ந்து, மற்ற சாட்சிகளின் விசாரணைக்காக இன்று இவ்வழக்கு விசாரணைக்கு வந்தது.

அப்போது ஜெயச்சந்திரன், சதானந்தன், கோபிநாத், கோதகுமார் ஆகிய 4 பேர் நேரில் ஆஜராகினர். அமைச்சர் பொன்முடி, கௌதம சிகாமணி எம்.பி., ராஜமகேந்திரன் உள்ளிட்ட 3 பேரும் ஆஜராகவில்லை. அவர்கள் ஆஜர் ஆகாததற்கான காரணம் குறித்து தி.மு.க. வக்கீல்கள் மனுதாக்கல் செய்தனர். தொடர்ந்து, இவ்வழக்கை விசாரித்த மாவட்ட முதன்மை நீதிபதி (பொறுப்பு) ஹெர்மிஸ், இவ்வழக்கின் விசாரணையை வருகிற 29 ஆம் தேதிக்கு ஒத்திவைத்து உத்தரவிட்டார்.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“

வெள்ளியங்கிரி மலையில், சித்ரா பவுர்ணமி தினமான நேற்று, ஆயிரக்கணக்கான பக்தர்கள் வெள்ளியங்கிரி ஆண்டவரை தரிசித்தனர்.

கோவை மேற்கு தொடர்ச்சி மலை அடிவாரத்தில், வெள்ளியங்கிரி ஆண்டவர் கோவில் உள்ளது. இக்கோவிலை ஒட்டி உள்ள மலை தொடரின் ஏழாவது மலை உச்சியில், சுயம்புவாக உள்ள ஈசனை தரிசிக்க, ஆண்டுதோறும், பிப்ரவரி முதல் மே மாதம் வரை மட்டுமே பக்தர்கள் மலையேற வனத் துறையினர் அனுமதி அளிக்கின்றனர்.

இந்தாண்டு, கடந்த, பிப்ரவரி மாதம் முதல் பக்தர்கள் மலையேற அனுமதிக்கப்பட்டு உள்ளனர். ஆண்டுதோறும், சித்ரா பவுர்ணமி தினத்தன்று, பல்லாயிரக் கணக்கான பக்தர்கள் வெள்ளியங்கிரி மலையேறி, ஈசனை வழிபடுவது வழக்கம்.

Video: வெள்ளியங்கிரி மலையில் குவிந்த பக்தர்கள்..

ட்ரோன் மூலம், தீ போன்ற நிகழ்வு ஏற்படாத வண்ணம் வனத்துறை சார்பில் கண்காணிப்பு#Coimbatore pic.twitter.com/o1msGs6PkD

— Indian Express Tamil (@IeTamil) April 24, 2024

நேற்றிரவு சித்ரா பவுர்ணமி என்பதால் ஏராளமான பக்தர்கள் வெள்ளியங்கிரி மலைக்கு வருகை புரிந்தனர்

இதையொட்டி கோவில் நிர்வாகம், வனத்துறை மற்றும் போலீசார் சார்பில், சிறப்பு ஏற்பாடுகள் செய்யப்பட்டது.

இந்நிலையில் கோவை வனக்கோட்டம் போலாம்பட்டி வனசரகம் பூண்டி வெள்ளியங்கிரி மலை ஏறும் பக்தர்களை ட்ரோன் மூலம், தீ போன்ற நிகழ்வு ஏற்படாத வண்ணம் வனத்துறை சார்பில் கண்காணிக்கப்படுகிறது.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற  https://t.me/ietamil“

சென்னை விமான நிலையத்தில் இளைஞரிடத்தில், 11 கிலோ எடையுள்ள ஹெராயின் பறிமுதல் செய்யப்பட்டுள்ளது.

சென்னை விமான நிலையத்தில் ரூ.11 கோடி மதிப்புள்ள ஹெராயின் போதைப்பொருள் பறிமுதல் செய்யப்பட்டுள்ளது. தேகாவில் இருந்து  சென்னை வந்த பயணியிடம் சந்தேகத்தின் பேரில் விமான நிலைய அதிகாரிகள் சோதனை மேற்கொண்டனர். அப்போது அவரிடம் இருந்து 11 கிலோ  எடையுள்ள ஹெராயின் வகை போதைப்பொருளை அதிகாரிகள் பறிதல் செய்தனர்.

பறிமுதல் செய்யப்பட்ட 11 கிலோ ஹெராயின் போதைப் பொருளின் சர்வதேச சந்தை மதிப்பு ரூ.11 கோடி என தகவல் வெளியாகி உள்ளது. இதையடுத்து போதைப் பொருளை கடத்தி வந்த இளைஞரிடம்  மத்திய வருவாய் புலனாய்வு பிரிவு அதிகாரிகள் விசாரணை மேற்கொண்டு வருகின்றனர்.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற  https://t.me/ietamil“

கடலூர் மாவட்டத்தில் அம்பேத்கர் சிலை மீது பெட்ரோல் குண்டு வீச முயன்ற சம்பவம் பெரும் பரபரப்பை ஏற்படுத்தியுள்ளது.

கடலூர் மாவட்டம் குள்ளஞ்சாவடி அருகே உள்ள அம்பலவாணன் பேட்டை கிராமத்தில் சட்டமேதை அம்பேத்கர் சிலை உள்ளது. இந்தநிலையில், நேற்று நள்ளிரவில் அம்பத்கேர் சிலை மீது மர்ம நபர்கள் பெட்ரோல் குண்டுகளை வீசியுள்ளனர்.

மர்ம நபர்கள் வீசிய பெட்ரோல் குண்டு அம்பேத்கர் சிலை மீது படாமல் அதற்கு பின்னால் இருந்த பழைய ஊராட்சி மன்ற கட்டடத்தின் மீது பட்டு வெடித்துள்ளது. சத்தம் கேட்டு அம்பலவாணன் பேட்டை கிராம பொது மக்கள் ஓடி வந்து பார்த்துள்ளனர். அப்போது இளைஞர்கள் சிலர் டூ வீலரில் கத்திக்கொண்டு விரைந்து சென்றுள்ளனர்.

இதையடுத்து, அம்பலவாணன் பேட்டை பொதுமக்கள் காவல்துறையில் புகார் அளித்துள்ளனர். இது தொடர்பாக அதே பகுதியை சேர்ந்த 4 இளைஞர்களிடம் போலீசார் விசாரணை நடத்தி வருவதாக தகவல் வெளியாகியுள்ளது.

அம்பேத்கர் சிலை மீது பெட்ரோல் குண்டு வீச முயன்ற சம்பவம் தமிழ்நாடு முழுவதும் பெரும் பரபரப்பை ஏற்படுத்தியுள்ளது. மேலும் முன்னெச்சரிக்கை நடவடிக்கையாக போலீசார் அம்பலவாணன் பேட்டை, குள்ளஞ்சாவடி பகுதிகளில் பாதுகாப்பு பணியில் ஈடுபடுத்தப்பட்டுள்ளனர்.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“