பால்கர்/தானே: மகாராஷ்டிரத்தில் வெவ்வேறு பகுதிகளில் நடைபெற்ற விநாயகர் சிலைகள் கரைக்கும் நிகழ்வின்போது இரண்டு பேர் நீரில் மூழ்கி உயிரிழந்துள்ள நிலையில், இருவரை காணவில்லை என்று காவல்துறை அதிகாரிகள் தெரிவித்தனர்.

சதுர்த்தி விழாவைத் தொடர்ந்து விநாயகர் சிலைகளை நீர் நிலைகளில் கரைப்பது வழக்கம். நேற்று (புதன்கிழமை) இரவு வாடா தாலுகாவின் கொன்சாய் கிராமத்தில் உள்ள ஏரியில் விநாயகர் சிலை கரைப்பின் போது ஜகத் நாராயண் மவுரியா(38) மற்றும் சூரஜ் பிரஜாபதி(25) ஆகியோர் நீரில் மூழ்கி இறந்தனர். அவர்களின் உடல்களை தீயணைப்பு மற்றும் நீச்சல் வீரர்கள் இன்று மீட்டனர் என்று காவல்துறை கட்டுப்பாட்டு அறை அதிகாரி ஒருவர் தெரிவித்தார்.

தானே மாவட்டம் முழுவதும், பொது இடங்களில் நிறுவப்பட்ட 18 சிலைகள் உள்பட 43,000 க்கும் மேற்பட்ட விநாயகர் சிலைகள் 10 நாள் திருவிழாவின் ஒன்றரை நாட்களுக்குப் பிறகு கரைக்கப்பட்டதாக அதிகாரிகள் தெரிவித்தனர்.

தானே நகரில் மட்டும் 11,910 கணபதி சிலைகள் கரைக்கப்பட்டதாக மாநகராட்சியின் பேரிடர் மேலாண்மை பிரிவின் தலைவர் யாசின் தாட்வி தெரிவித்தார். இதனிடையே, அண்டை மாவட்டமான பால்கர் மாவட்டத்தில் 4,500 சிலைகள் மிகுந்த பக்தியுடனும், மத எழுச்சியுடனும் கரைக்கப்பட்டன.

யானைத் தலை கடவுளான விநாயகரிடமிருந்து விடைபெறுவதற்காக நீர் நிலைகளில் செல்லும்போது மக்கள் பாடல்கள், இசை மற்றும் மேளதாளங்கள் முழங்க நடனமாடினர்.

கேரள மாநிலம், கோழிக்கோட்டில் சமீபத்தில் பரிசோதிக்கப்பட்ட 24 பேரின் மாதிரிகள் எதிர்மறையாக வந்துள்ளதையடுத்து நீபா வைரஸ் தொற்றின் தீவிரம் குறைந்து வருவதாக தகவல் வட்டாரங்கள் தெரிவிக்கின்றன. 

கோழிக்கோட்டில் கடந்த வாரம் நிபா வைரஸ் பாதித்து இரண்டு பேர் உயிரிழந்ததைத் தொடர்ந்து அங்கு முன்னெச்சரிக்கை நடவடிக்கைகள் பலப்படுத்தப்பட்டது. சரியான நேரத்தில் சுகாதாரத்துறை மேற்கொண்ட நடவடிக்கைத் தொடர்ந்து 352-க்கும் மேற்பட்டோருக்கு சோதனை நடத்தப்பட்டது. 

நிபா தொற்றுக்கு ஆறு பேர் பாதிக்கப்பட்ட நிலையில், 952 பேர் கண்காணிப்பில் இருந்தனர். தற்போது சமீபத்தில் பரிசோதிக்கப்பட்ட 24 பேரின் மாதிரிகளும் எதிர்மறையாக வந்துள்ளது. 

படிக்க: நடனமாடிக்கொண்டிருந்த இளைஞர் மாரடைப்பால் மரணம்: ஆந்திரத்தில் அதிர்ச்சி! 

இதையடுத்து, கேரளத்தில் நிபா தொற்று காய்ச்சலின் தீவிரம் கொஞ்சம் கொஞ்சமாக நீங்கி வருகிறது என்பது குறிப்பிடத்தக்கது. 

மும்பை: ரூ.1.43 கோடி மதிப்புள்ள 4,773 கிலோ சரஸ் போதைப்பொருளுடன் 3 பேரை மும்பை காவல் துறையின் போதைப்பொருள் தடுப்பு பிரிவு கைது செய்துள்ளது.

மும்பை பாந்த்ரா குற்றப்பிரிவின் போதைப்பொருள் தடுப்பு பிரிவுக்கு கிடைத்த ரகசிய தகவலின் அடிப்படையில் வடாலா மேற்கு மற்றும் சேவ்ரியை சேர்ந்த மூன்று பேரையும் கைது செய்தனர்.

சரஸ்களை விநியோகம் செய்ய வேறு மாநிலத்திலிருந்து மும்பைக்கு கடத்தி வரப்பட்டதை நாங்கள் மீட்டு அவர்களை கைது செய்துள்ளோம்.

இந்த கடத்தல் நெட்வொர்க் குறித்த விவரங்கள் குறித்து தொடர்ந்து விசாரணை நடைபெற்று வருகிறது.

நாக்பூர்: நாக்பூரில் ரூ.3.36 கோடி மதிப்புள்ள 84,537 கிலோ பாக்குகளை மகாராஷ்டிரா உணவு மற்றும் மருந்து நிர்வாக குழு பறிமுதல் செய்துள்ளது.

கலம்னா மற்றும் லிஹிகான் ஆகிய இடங்களில் நேற்று (புதன்கிழமை) நடைபெற்ற சோதனைகளில் ரூ.56.19 லட்சம் மதிப்புள்ள 11,727 கிலோ பாக்கும் அதே போல் ரூ.2.60 கோடி மதிப்புள்ள 72,810 கிலோ பாக்கும் பறிமுதல் செய்யப்பட்டது.

பறிமுதல் செய்த பாக்கு தரம் குறைந்ததாகவும், சுகாதார சீர்கேடு ஏற்படுத்துவதாகவும் இருந்தது என்று அதிகாரிகள் தெரிவித்தனர்.

புது தில்லி: இந்தியா - கனடா நாடுகளுக்கு இடையேயான உறவில் விரிசல் ஏற்பட்டிருக்கும் நிலையில், கனடா நாட்டில் விசா வழங்குவது நிறுத்தப்பட்டிருப்பது ஏன் என்பது குறித்து வெளியுறவுத் துறை விளக்கம் அளித்துள்ளது.

புது தில்லியில் இன்று செய்தியாளர்களை சந்தித்த மத்திய வெளியுறவுத் துறை செய்தித் தொடர்பாளர் அரிந்தம் பக்சி,  தீவிரவாதிகளின் புகலிடமாக திகழ்கிறது கனடா என்று குற்றம்சாட்டியிருக்கிறார்.

மேலும், அவர் பேசுகையில், குற்றவாளிகளின் புகலிடமாக கனடா மாறிவருகிறது. இந்தியாவுக்கு எதிராகக் குற்றச்செயலில் ஈடுபடுவோர் மீது கனடா அரசு எந்த நடவடிக்கையும் எடுக்கவில்லை

கனடாவில் இருந்து குற்றச் செயலில் ஈடுபடுவோர் பற்றி இந்திய அரசு சார்பில் ஆதாரங்கள் அளித்தும் எந்த நடவடிக்கையும் எடுக்கப்படுவதில்லை.

கனடா நாட்டில் உள்ள இந்திய தூதரக அதிகாரிகளுக்கு அச்சுறுத்தல் விடுக்கப்பட்டுள்ளது. அச்சுறுத்தல் காரணமாகவே இந்திய தூதரகத்தில் விசா வழங்கும் பணி தற்காலிகமாக நிறுத்தப்பட்டுள்ளது. கனடா தனது நற்பெயரை காக்க வேண்டும் என்றும் வெளியுறவுத் துறை சார்பில் வலியுறுத்தப்பட்டுள்ளது.

இந்தியாவிலிருந்து கனடா செல்லும் மக்கள் எச்சரிக்கையாக இருக்குமாறு மத்திய அரசு நேற்று பயண எச்சரிக்கை விடுத்திருந்த நிலையில், கனடாவிலிருந்து வருவோருக்கு விசா வழங்குவதை இந்திய தூதரகம் இன்று  நிறுத்தியிருக்கிறது.

இந்தியாவால் தேடப்பட்டு வந்த காலிஸ்தான் பிரிவினைவாத பயங்கரவாதி ஹா்தீப் சிங் நிஜ்ஜாா் (45) கனடாவில் கொல்லப்பட்டதற்கு இந்திய அரசு ஏஜெண்டுகளின் தலையீடு உள்ளதாக அந்நாட்டு பிரதமா் ஜஸ்டின் ட்ரூடோ நாடாளுமன்றத்தில் குற்றஞ்சாட்டியிருந்தார்.

இதைத் தொடா்ந்து, அந்நாட்டில் உள்ள இந்திய தூதரக மூத்த அதிகாரி வெளியேறுமாறும் கனடா அரசு உத்தரவிட்டது.

இதையும் படிக்க.. கார் ஓட்டுநரின் வங்கிக் கணக்கில் ரூ.9,000 கோடி: அடுத்து நடந்த ட்விஸ்ட்!

இந்தக் குற்றச்சாட்டை மறுத்த இந்திய அரசு, பதிலடியாக இந்தியாவில் உள்ள கனடா தூதரக உயா் அதிகாரி வெளியேற உத்தரவிட்டது.

இந்த விவகாரம் இரு நாடுகளுக்கு இடையே கடந்த சில மாதங்களாக பெரும் சா்ச்சையை ஏற்படுத்தி வந்த நிலையில், தற்போது தீவிரமடைந்துள்ளது. 

புது தில்லி: புகழ்பெற்ற பரதநாட்டியக் கலைஞர் சரோஜா வைத்தியநாதன் இன்று அவரது இல்லத்தில் காலமானார். அவருக்கு வயது 86.

இரண்டு நாள்களுக்கு முன்புதான் தனது 86வது பிறந்தநாளைக் கொண்டாடிய சரோஜா வைத்தியநாதன், புற்றுநோய் பாதித்து சிகிச்சை பெற்று வந்த நிலையில் இன்று காலமானார்.

கடந்த சில காலமாக புற்றுநோய் பாதித்து சிகிச்சை பெற்று வந்த அவர், வியாழக்கிழமை காலை 4 மணிக்கு வீட்டிலேயே உயிரிழந்ததாக அவரது மருமகளும் நடனக் கலைஞருமான ரமா வைத்தியநாதன் தெரிவித்துள்ளார்.

சரோஜா வைத்தியநாதன், 2002ஆம் ஆண்டு பத்ம ஸ்ரீ மற்றும் 2013ஆம் ஆண்டு பத்ம பூஷண் விருதுகளையும் பெற்றவர்.

பிரபல பரத நாட்டியக் கலைஞரான சரோஜா வைத்தியநாதன், புது தில்லியில் நாட்டியாலயா நடனப் பள்ளியை நடத்தி வந்தார். தில்லியில் செயல்பட்டு வரும் கணேசா நாட்டியாலயா நடனப் பள்ளியில் பரதநாட்டியம் கற்றுக்கொண்ட பலரும் உலகின் பல இடங்களில் பரதநாட்டிய பள்ளிகளைத் தொடங்கி நடத்தி வருகிறார்கள் என்பது குறிப்பிடத்தக்கது.
 

கர்நாடகத்தின் ராமநகரா மாவட்டத்தில் உள்ள அரசு நடத்தும் மொரார்ஜி தேசாய் உறைவிடப் பள்ளியின் சுவர் இடிந்து விழுந்ததில் 12 வயது சிறுவன் உயிரிழந்தான். 

பிடாதி அருகே எச்.கொல்லஹள்ளி கிராமத்தில் அமைந்துள்ள உறைவிடப் பள்ளி வளாகத்தில் வியாழக்கிழமை காலை இந்த சம்பவம் நடைபெற்றது. 

உயிரிழந்த மாணவன் உறைவிடப் பள்ளியில் ஆறாம் வகுப்பு படிக்கும் கௌசிக் கௌடா ஆவார். காலையில் முகம் கழுவிக்கொண்டிருந்த கௌசிக் மீது சுவர் இடிந்து விழுந்துள்ளது.

தலையில் பலத்த காயம் ஏற்பட்ட சிறுவனை மருத்துவமனைக்குக் கொண்டு சென்றனர். பலத்த ரத்தக்கசிவு ஏற்பட்ட மாணவன் ஏற்கனவே உயிரிழந்ததாக மருத்துவர்கள் தெரிவித்தனர். மேலும் இரண்டு மாணவர்கள் பலத்த காயமடைந்து பெங்களூரு மருத்துவமனையில் சிகிச்சை பெற்று வருகின்றனர். 

படிக்க: நடனமாடிக்கொண்டிருந்த இளைஞர் மாரடைப்பால் மரணம்: ஆந்திரத்தில் அதிர்ச்சி! 

குழந்தைகளின் பாதுகாப்பை உறுதி செய்வதில் அதிகாரிகள் காட்டும் அலட்சியத்தைக் கண்டித்து சிறுவனின் பெற்றோர் மற்றும் குடும்பத்தினர் கண்டனம் தெரிவித்தனர். 

இதுகுறித்து போலீஸார் வழக்குப்பதிவு செய்து விசாரணை நடத்தி வருகின்றனர். 

உத்தர பிரதேசம் வாராணசியில் அமையவிருக்கும் சர்வதேச கிரிக்கெட் மைதானத்திற்கு பிரதமர் நரேந்திர மோடி வருகிற செப். 23(சனிக்கிழமை) அடிக்கல் நாட்டுகிறார். 

பிரதமர் நரேந்திர மோடி, தனது சொந்த தொகுதியான உத்தர பிரதேச மாநிலம் வாராணசிக்கு வருகிற செப். 23 ஆம் தேதி செல்லவிருக்கிறார். 

இந்நிலையில் விளையாட்டுத் துறைக்கான கட்டமைப்பை மேம்படுத்தும் பொருட்டு இங்கு சர்வதேச கிரிக்கெட் மைதானம் அமைய உள்ளது. 

30 ஏக்கருக்கும் மேலான பரப்பளவில் ரூ.450 கோடி செலவில் அனைத்து வசதிகளுடன் கட்டப்பட உள்ளது. சுமார் 30,000 பேர் இதில் அமர முடியும். கடவுள் சிவனை அடிப்படையாக கொண்டு இந்த கிரிக்கெட் மைதானம் உருவாக்கப்பட உள்ளதாகத் தகவல்கள் வெளியாகியுள்ளன. திரிசூலம் வடிவலான விளக்கு கோபுரங்களும் உடுக்கை வடிவலான மையப்பகுதியும் பிறை நிலா வடிவலான மேற்கூறையும் அமைய உள்ளதாகவும் கூறப்படுகிறது. இதற்கு பிரதமர் நரேந்திர மோடி அடிக்கல் நாட்டுவார் என்றும் கூறப்பட்டது. 

இதையும் படிக்க | இதழியலில் செய்யறிவு (ஏஐ) தொழில்நுட்பம்: ஆபத்தா, வாய்ப்பா? 

இந்நிலையில் பிரதமர் அலுவலகம் இதனை உறுதி செய்துள்ளது, உத்தரபிரதேசத்தில் ருத்ராக்ஷ் சர்வதேச ஒத்துழைப்பு மற்றும் மாநாட்டு மையத்தில் நடைபெறும் காசி சன்சத் சமஸ்கிருத மஹோத்சவின் நிறைவு விழாவில் பிரதமர் மோடி பங்கேற்கிறார், மேலும் மாநிலத்தில் கட்டப்பட்டுள்ள 16 பள்ளிகளைத் திறந்து வைக்கிறார். 

தொடர்ந்து, வாராணசியில் அமையவிருக்கும் சர்வதேச கிரிக்கெட் மைதானத்திற்கு அடிக்கல் நாட்டுகிறார். நவீன உலகத் தரம் வாய்ந்த விளையாட்டு உள்கட்டமைப்பை மேம்படுத்துவதற்கான பிரதமரின் பார்வையை நனவாக்குவதற்கான ஒரு படியாக இது இருக்கும் என்று கூறியுள்ளது.  

இந்த அடிக்கல் நாட்டு விழாவில் கிரிக்கெட் நட்சத்திரங்கள் பலருக்கும் அழைப்பு விடுக்கப்பட்டுள்ளது. சச்சின் டெண்டுல்கர், கபில் தேவ், சுனில் கவாஸ்கர், ரவி சாஸ்திரி மற்றும் பிசிசிஐ நிர்வாகிகள் கலந்துகொள்கின்றனர். 

எல்&டி நிறுவனம் உருவாக்கும் இந்த மைதானம் இரண்டு ஆண்டுகளுக்குள்  பயன்பாட்டுக்கு வரும் என்று தெரிவிக்கப்பட்டுள்ளது. 

முதுநிலை மருத்துவப் படிப்புகளுக்கான கலந்தாய்வில் பங்கேற்க நீட் தகுதி மதிப்பெண் எதுவும் தேவையில்லை என்றால், நீட்-முதுநிலை தேர்வில் மைனஸ் மதிப்பெண் எடுத்த 13 பேரும், பூஜ்ஜியம் மதிப்பெண் எடுத்த 14 பேரும் கலந்தாய்வில் பங்கேற்க தகுதிபெறுவார்கள் என்ற தகவல் கிடைக்கப்பெற்றுள்ளது.

அதாவது, நடந்து முடிந்த நீட் முதுநிலை தேர்வில், மொத்த தேர்ச்சி விவரங்களை ஆய்வு செய்ததில், 14 மருத்துவர்கள் நீட் தேர்வில் வெறும் பூஜ்ஜியம் மதிப்பெண் எடுத்துள்ளனர். அவர்களையும் தாண்டி, 13 பேர் மைனஸ் மதிப்பெண்கள் பெற்றுள்ளனர். அதிகபட்சமாக ஒருவர் 800க்கு மைனஸ் 40 மதிப்பெண்கள் பெற்றுள்ளார்.

அப்பாடியானால், முதுநிலை மருத்துவப் படிப்புகளுக்கான கலந்தாய்வில் பங்கேற்க நீட் தோ்வில் பங்கேற்றிருந்தால் போதுமானது என்றும், தகுதி மதிப்பெண் எதுவும் தேவையில்லை என்றும் மத்திய மருத்துவக் கலந்தாய்வுக் குழு அறிவித்திருப்பதால், மைனஸ் மற்றும் பூஜ்ஜிய மதிப்பெண் எடுத்தவர்களுடன் 800க்கு மைனஸ் 40 மதிப்பெண் எடுத்தவரும் முதுநிலை மருத்துவப் படிப்புக்கான கலந்தாய்வில் பங்கேற்க தகுதி பெறுகிறார் என்பதுதானே அர்த்தமாகிறது?

இதையும் படிக்க.. உட்கார்ரா.. உதை வாங்கப் போற..: மக்களவையில் ஆவேசமான தயாநிதிமாறன்

அதாவது, ஒட்டுமொத்தமாக 2 லட்சத்துக்கும் மேற்பட்டவர்கள் இந்த தேர்வை எழுதியுள்ளனர். அதில், 200517வது ரேங்க் எடுத்தவருக்கும் முதுநிலை மருத்துவக் கலந்தாய்வில் பங்கேற்கும் வாய்ப்பு கிடைக்கப்போகிறது.

இதில் இன்னும் ஆழமாகச் சென்று ஆய்வு செய்தால், நீட் தேர்வு எழுதி 50 மதிப்பெண்ணுக்கும் குறைவாக மதிப்பெண் எடுத்த 700 பேருக்கும் கூட முதுநிலை மருத்துவம் படிக்க வாய்ப்பு அளிக்கப்படவிருக்கிறது. இதனால், யார் வேண்டுமானாலும் நீட் முதுநிலை தேர்வெழுதலாம்.. பூவா தலையா போட்டுப் பார்த்து விடைகளை குறித்துவைத்துவிட்டு வரலாம் என்பதைப் போல ஆகிவிடுகிறதே என்ற கேள்வி பலருக்கும் எழத்தான் செய்கிறது.

அதாவது, நீட் தேர்வில் ஒட்டுமொத்தமாக 200 கேள்விகள் கேட்கப்படும். அதற்கு விடையை தேர்வு செய்யும் வகையில் அமைந்திருக்கும். ஒரு  கேள்விக்கு நான்கு மதிப்பெண்கள். தவறாக பதிலளித்திருந்தால் ஒரு நெகடிவ் மதிப்பெண். 

நீட் தேர்வுக்குத் தயாராகாமல், கண்ணை மூடிக்கொண்டு ஒருவர் வினாக்களுக்கு ஏதோ ஒரு பதிலை குறியிடுகிறார் என்றால் கூட, அவருக்கு குறைந்தது 50 மதிப்பெண்களாவது கிடைத்துவிடும். அதற்கும் கீழே மதிப்பெண் எடுப்பது என்றால், மேலே சொன்ன உதாரணத்தையும் விட மோசமான நிலைதான். அவர்களுக்கும் கலந்தாய்வில் பங்கேற்க வாய்ப்பு கிடைக்கும் என்றால்.. நீட் தேர்வு எழுத விண்ணப்பித்து, குறைவான மதிப்பெண் எடுத்துவிடுவோமோ என்ற அச்சத்தில் தேர்வெழுத வராதவர்கள் மட்டும்தான் இதில் கவலைப்பட வேண்டுமா?

இதையும் படிக்க.. கார் ஓட்டுநரின் வங்கிக் கணக்கில் ரூ.9,000 கோடி: அடுத்து நடந்த ட்விஸ்ட்!

மைனஸ் மதிப்பெண் எடுத்தவர்களுக்கு நியூரோ சர்ஜன் போன்ற முதுநிலை மருத்துவப் படிப்புகளில் சேர்ந்து பயிலும் வாய்ப்பு வழங்கினால்.. அவர்களிடம் சிகிச்சை பெறச் செல்லும் நோயாளிகள்நிலைதான் பாவமா? அல்லது மருத்துவம் பயில நீட் தேர்வு கட்டாயம் என்பதை இன்னமும் உறுதிபடக் கூறுவதை கேட்டுக்கொண்டிருப்பவர்கள்தான் அப்பாவிகளா என்ற எண்ணற்றக் கேள்விகள் எழுகின்றன.

நாடு முழுவதும் அரசு, தனியாா் மருத்துவக் கல்லூரிகள், நிகா்நிலைப் பல்கலைக்கழகங்கள், மத்திய அரசின் கல்வி நிறுவனங்களில் மருத்துவப் பட்டமேற்படிப்புகளான எம்டி, எம்எஸ், முதுநிலை டிப்ளமோ மற்றும் பல் மருத்துவப் பட்டமேற்படிப்பான எம்டிஎஸ் படிப்புகளுக்கான இடங்கள் முதுநிலை நீட் தோ்வு மூலம் நிரப்பப்பட்டு வருகிறது.

இந்த நீட் தோ்வை தேசிய மருத்துவ அறிவியல் தோ்வுகள் வாரியம் (என்பிஇஎம்எஸ்) நடத்துகிறது. நாடு முழுவதும் அரசு மருத்துவக் கல்லூரிகளில் உள்ள முதுநிலை மருத்துவ இடங்களில் 50 சதவீத இடங்கள் அகில இந்திய ஒதுக்கீட்டுக்கு வழங்கப்படுகின்றன.

இந்த இடங்களுக்கும், நிகா்நிலைப் பல்கலைக்கழகங்களின் இடங்களுக்கும், மத்திய அரசின் கல்வி நிறுவனங்களின் இடங்களுக்குமான கலந்தாய்வை மத்திய மருத்துவக் கலந்தாய்வு குழு (எம்சிசி) இணையவழியில் நடத்தி வருகிறது.

எம்டி, எம்எஸ், முதுநிலை டிப்ளமோ மற்றும் எம்டிஎஸ் படிப்புகளுக்கான 2023-24-ஆம் கல்வி ஆண்டு மாணவா் சோ்க்கைக்கான கலந்தாய்வு இணையதளத்தில் கடந்த ஜூலை 27-ஆம் தேதி தொடங்கியது.

மூன்று சுற்று கலந்தாய்வு நிறைவடைந்துள்ளது. மூன்றாம் சுற்று முடிவுகள் இன்னும் வெளியிடப்படவில்லை. இந்நிலையில், முதுநிலை மருத்துவப் படிப்புகளுக்கு அதிக இடங்கள் காலியாகவுள்ளதால், நீட் தோ்வு எழுதிய அனைவரையும் பங்கேற்கச் செய்து, அந்த இடங்களை நிரப்புவதற்காக நீட் தகுதி மதிப்பெண்ணை பூஜ்ஜியமாக மருத்துவக் கலந்தாய்வு குழு அறிவித்துள்ளது.

எனவே, அவகாசம் நீட்டிக்கப்பட்டுள்ள முதுநிலை மருத்துவக் கலந்தாய்வில் புதிய விதிகளின்படி, நீட் தோ்வு எழுதிய அனைவரும் இணையவழியில் பதிவு செய்து பங்கேற்கலாம் என்றும், ஏற்கெனவே பதிவு செய்தவா்கள் மீண்டும் பதிவு செய்யத் தேவையில்லை என்றும் தெரிவிக்கப்பட்டுள்ளது.

தமிழகத்தைப் பொருத்தவரை அகில இந்திய ஒதுக்கீட்டுக்குப் போக, அரசு மருத்துவக் கல்லூரிகளில் மீதமுள்ள 50 சதவீத இடங்கள், தனியாா் மருத்துவக் கல்லூரிகளின் மாநில அரசுக்கான இடங்கள் மற்றும் நிா்வாக ஒதுக்கீட்டு இடங்களுக்கான கலந்தாய்வை மருத்துவக் கல்வி மற்றும் ஆராய்ச்சி இயக்ககம் (டிஎம்இ) நடத்தி வருகிறது.

மாநில இடங்களுக்கான கலந்தாய்வு
இணையதளங்களில் கடந்த ஆகஸ்ட் 7-ஆம் தேதி தொடங்கியது. இரண்டு சுற்று கலந்தாய்வு நிறைவடைந்துள்ள நிலையில், காலியாகவுள்ள இடங்களை நிரப்புவதற்கான மூன்றாம் சுற்று கலந்தாய்வு புதிய அறிவிப்பின்படி தகுதி மதிப்பெண் எதுவுமின்றி நடைபெறவுள்ளது.
 

ஆந்திரத்தில் விநாயகர் சதுர்த்தி கொண்டாட்டத்தின்போது நடனமாடிக்கொண்டிருந்த இளைஞர் திடீரென மாரடைப்பால் உயிரிழந்த சம்பவம் பெரும் அதிர்ச்சியை ஏற்படுத்தியுள்ளது. 

சத்ய சாய் மாவட்டம் தர்மாவரம் நகரில் விநாயகர் சதுர்த்தி கொண்டாட்டம் நடைபெற்று வந்தது. இந்த நிலையில் பிரசாத் (26) தனது நண்பருடன் சேர்ந்து நடனமாடிக்கொண்டிருந்தார். அப்போது திடீரென சுருண்டு விழுந்தார். அவர் உடனே தர்மாவரம் அரசு மருத்துவமனைக்குக் கொண்டுசெல்லப்பட்டார். ஆனால் அவர் ஏற்கனவே இறந்துவிட்டதாக மருத்துவர்கள் தெரிவித்தனர். 

விழாவின்போது இளைஞர்கள் நடனமாடும் விடியோ சமூக வலைத்தளங்களில் வேகமாகப் பரவியது. இதுகுறித்து போலீஸார் விசாரனை மேற்கொண்டு வருகின்றனர். 

ஆந்திர, தெலங்கானா மாநிலங்களில் கடந்த சில மாதங்களாக இதுபோன்ற சம்பவங்கள் தொடர்கின்றன. 

pic.twitter.com/RUqf1mzRMR

— Telugu Scribe (@TeluguScribe) September 21, 2023

கடந்த மாதம் தெலங்கானா மாநிலம் கரீம்நகர் மாவட்டத்தில் 16 வயது மாணவி கல்லூரி விழாவில் நடனமாடும்போது மாரடைப்பால் உயிரிழந்தார். 

நைலகொண்டனப்பள்ளியில் ஜூனியர் கல்லூரில் 11-ம் வகுப்பு படிக்கும் மாணவி நடனமாடிக்கொண்டிருந்தபோது திடீரென உயிரிழந்தார். 

ஜூலை மாதம், கம்மத்தில் உள்ள ஜிம்மில் உடற்பயிற்சியின் போது 31 வயது இளைஞர் மாரடைப்பால் இறந்தார். ஜூன் மாதம், ஜக்தியால் நகரில் பேட்மிண்டன் விளையாடிக் கொண்டிருந்த ஒருவர் மாரடைப்பால் இறந்தார். மார்ச் மாதம், ஆந்திர மாநிலம் பாபட்லாவில் பள்ளி ஆசிரியர் ஒருவர் வகுப்பறையில் மாரடைப்பு ஏற்பட்டு இறந்தார்.

கரோனா தொற்றுக்குப் பிறகு மாரடைப்பால் உயிரிழக்கும் சம்பவங்கள் அதிகரித்து வருவதாக ஆய்வுகள் தெரிவிக்கின்றன. 

பிரதமர் நரேந்திர மோடி எப்போதும் ராஜஸ்தானுக்கு முன்னுரிமை அளித்து வருவதாக உத்தரகண்ட் முதல்வர் புஷ்கர் சிங் தாமி வியாழக்கிழமை தெரிவித்தார். 

ராஜஸ்தானின் கோடாவில் பரிவர்தன் சங்கல்ப் யாத்ராவில் பங்கேற்ற முதல்வர் தாமி செய்தியாளர்களிடம் கூறியது, 

பிரதமர் மோடி எப்போதும் ராஜஸ்தானுக்கு முன்னுரிமை கொடுத்து வருகிறார். ஆனால் மத்திய அரசு வழங்கும் பட்ஜெட்டை செலவழிக்க விரும்பாத அரசு கடந்த 5 ஆண்டுகளாக ராஜஸ்தானில் செயல்பட்டு வருகிறது. ராஜஸ்தான் மக்களுக்கு அவர்கள் லாபம் கொடுக்க விரும்பவில்லை. 

படிக்க: ஸ்பெயினிலிருந்து துபை சென்றடைந்தார் மம்தா!

கடந்த 24 மணி நேரத்தில் நான் பல இடங்களில் பரிவர்தன் சங்கல்ப் யாத்திரையில் பங்கேற்றேன். 100க்கும் மேற்பட்ட இடங்களில் சிறிய முதல் பெரிய சந்திப்புகளை நடத்தினேன். பாஜக ஆட்சி அமைக்க வேண்டும் என்ற தெய்வீக நம்பிக்கை கொண்ட பெண்களைப் பார்த்தேன். இளைஞர்களிடையே பெரும் உற்சாகமும் ஆற்றலும் இருந்தது. இந்த முறை ராஜஸ்தான் மக்கள் மாற்றத்தை விரும்புகின்றனர் என்று நான் நினைக்கிறேன். 

ராஜஸ்தானில் சட்டப்பேரவைத் தேர்தல் இந்தாண்டு இறுதியில் நடைபெற உள்ள நிலையில், கட்சிகள் வாக்காளர்களைக் கவர்வதில் ஆர்வம் காட்டி வருகின்றனர் என்பது குறிப்பிடத்தக்கது. 
 

பிக் பாஸ் நிகழ்ச்சி வருகையால் விஜய் தொலைக்காட்சியில் ஒளிப்பரப்பாகி வரும் முக்கிய தொடரின் ஒளிபரப்பு நேரம் மாற்றம் செய்யப்பட்டுள்ளது.

விஜய் தொலைக்காட்சியில் ஒளிபரப்பாகி வரும் தொடர்களைப் பார்ப்பதற்கே தனி ரசிகர்கள் உள்ளனர். அந்த வகையில் ஈரமான ரோஜாவே - 2 தொடர் இரவு 9.30 மணிக்கு திங்கள் முதல் வெள்ளி வரை ஒளிபரப்பாகி வருகிறது.

இந்த தொடரின் முதல் பாகம் கடந்த 2018 முதல் 2021 வரை ஒளிபரப்பாகி ரசிகர்களிடம் நல்ல வரவேற்பைப் பெற்றது. இதைத் தொடர்ந்து ஈரமான ரோஜாவே - 2 ஆம் பாகம் கடந்த ஜனவரி மாதம் ஒளிபரப்பாகி வருகிறது.

இத்தொடரில் சித்தார்த், திரவியம் ராஜகுமாரன், ஸ்வாதி கொண்டே, கேப்ரியல்லா ஆகியோர் முதன்மை கதாபாத்திரத்தில் நடித்து வருகின்றனர். இத்தொடர் டிஆர்பியில் பின்தங்கியுள்ளதாக கூறப்படுகிறது.

இந்த நிலையில், பிக் பாஸ் நிகழ்ச்சி வரும் அக்டோபர் 2 ஆம் தேதி தொடங்கவுள்ளதால், தொடர்களின் ஒளிபரப்பு நேரத்தை மாற்ற சேனல் தரவு முடிவெடுத்துள்ளது.

ஈரமான ரோஜாவே - 2 தொடரின் ஒளிபரப்பு நேரத்தை மாற்ற இருப்பதாக கூறப்படுகிறது.

இதையும் படிக்க: திருமண வாழ்க்கையில் நுழைந்த வானத்தைப்போல தொடர் நடிகர்!

அதன்படி, பிரைம் நேரத்தில்(Prime Time) ஒளிபரப்பான ஈரமான ரோஜாவே - 2 தொடர், அக்டோபர் 2 முதல் நான் பிரைம் நேரமான(Non Prime Time) மதியம் 1.30 மணிக்கு ஒளிபரப்பாகவுள்ளது.

Vijay antony statement on daughters death : நடிகரும் இசையமைப்பாளருமான விஜய் ஆண்டனியின் மூத்த மகள் மீரா. 12ஆம் வகுப்பு மாணவியான இவர், கடந்த இரு தினங்களுக்கு முன்பு வீட்டில் தற்கொலை செய்துகொண்டார்.

இந்த நிலையில்ந விஜய் ஆண்டனி உருக்கமான அறிக்கை ஒன்றை பகிர்ந்துள்ளார். அதில், “அன்பு நெஞ்சங்களே, என் மகள் மீரா மிகவும் அன்பானவள், தைரியமானவள்.

pic.twitter.com/Kt5EUSlZFq

— vijayantony (@vijayantony) September 21, 2023

அவள் இப்போது இந்த உலகை விட சிறந்த ஜாதி, மதம், பணம், பொறாமை, வலி, வறுமை, வன்மம் இல்லாத ஒரு அமைதியான இடத்திற்கு சென்று இருக்கிறாள்.
என்னிடம் பேசிக்கொண்டுதான் இருக்கிறாள். அவளுடன் நானும் இறந்துவிட்டேன். நான் இப்போது அவளுக்காக நேரம் செலவிட ஆரம்பித்துள்ளேன்.

அவள் பெயரில் நான் செய்யப் போகும் நல்ல காரியங்கள் அனைத்தையும் அவளே தொடங்கி வைப்பாள். உங்கள் விஜய் ஆண்டனி” எனத் தெரிவித்துள்ளார்.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“

TTF Vasan case in Kanchipuram : காஞ்சிபுரம் அருகே சென்னை- பெங்களூரு தேசிய நெடுஞ்சாலையில் பாலுசெட்டி சத்திரம் அருகே கடந்த சில நாள்களுக்கு முன்பு பைக்கில் சென்றபோது டி.டி.எஃப் வாசன் விபத்தில் சிக்கினார்.
இவர், சாலையில் சாகசம் செய்ய முயன்ற போது நிலை தடுமாறி கீழே விழுந்தார் எனக் கூறப்படுகிறது. இதளை டிடிஎஃப் வாசன் மறுத்துள்ளார்.

இந்த விபத்தில் டிடிஎஃப் வாசனுக்கு கையில் எலும்பு முறிவு ஏற்பட்டது. உடலில் பல்வேறு இடங்களில் காயம் ஏற்பட்டுள்ளது. இந்த நிலையில் அவரை போலீசார் கைதுசெய்தனர்.
அவர் மீது அதிவேகமாக பைக் ஓட்டுதல், விபத்தை ஏற்படுத்துதல் உள்ளிட்ட 5 பிரிவுகளின் கீழ் வழக்குப்பதிவு செய்யப்பட்டுள்ளது.

இதையடுத்து அவர் சிறையில் அடைக்கப்பட்டுள்ளார். இந்த நிலையில், ஜாமின் கோரி அவர் காஞ்சிபுரம் நீதிமன்றத்தில் மனுத்தாக்கல் செய்திருந்தார்.
இந்த மனுவை விசாரித்த காஞ்சிபுரம் குற்றவியல் நீதிமன்றம் அவருக்கு பிணை வழங்க மறுத்துவிட்டது. இதற்கிடையில் டிடிஎஃப் வாசன் ரசிகர் ஒருவர் வீடியோ ஒன்று வெளியிட்டுள்ளார்.

அந்த வீடியோவில், டிடிஎஃப் வாசனை வெளியே விட வேண்டும். அவர் 3 நாள்கள் அல்லது ஒரு வாரத்துக்குள் வெளியே வராவிட்டால் போராட்டம் நடத்தப்போவதாக எச்சரித்துள்ளார்.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“

மறைந்த முன்னாள் முதல்வர் அண்ணா குறித்து  பா.ஜ.க தலைவர் அண்ணாமலை கூறிய கருத்து, பெரும் சர்ச்சையான நிலையில், 1956 மதுரை நிகழ்ச்சியில், அண்ணா - முத்துராமலிங்கத் தேவர் இடையே உண்மையில் என்ன நடந்தது என்று அன்றைக்கு இந்து ஆங்கில நாளிதழில் பிரசுரமான செய்தி வெளியாகி உள்ளது.

அண்மையில் சனாதனம் பற்றி அமைச்சர் உதயநிதி ஸ்டாலின் பேசியதை கண்டித்து பா.ஜ.க சார்பில் ஆர்ப்பாட்டம் நடந்தது. இந்த ஆர்ப்பாட்டத்தில் பேசிய பாஜக மாநிலத் தலைவர் அண்ணாமலை,  மதுரையில் 1956-ல் தமிழ் மாநாட்டில் கடவுளை கேலி செய்து முன்னாள் முதல்வர் அண்ணாதுரை பேசியதாகவும், இதனால், முத்துராமலிங்கத் தேவர் ஆவேசம் அடைந்ததால் அண்ணாவும், பி.டி. ராஜனும் மன்னிப்பு கேட்டுவிட்டு அங்கிருந்து ஓடி வந்ததாகவும் கூறினார். 

பா.ஜ.க மாநிலத் தலைவர் அண்ணாமலை, முன்னாள் முதல்வரும் தி.மு.க-வை நிறுவியவருமான அண்ணா, முத்துராமலிங்கத் தேவரிடம் மன்னிப்பு கேட்டுவிட்டு ஓடிவந்ததாகப் பேசியது பெரும் சர்ச்சையானது. அண்ணா பற்றிய அவதூறான பேச்சுக்கு தி.மு.க தலைவர்கள் மட்டுமல்லாமல் பா.ஜ.க-வின் தேசிய ஜனநாயகக் கூட்டணியில் இடம்பெற்ற அ.தி.மு.க தலைவர்களும் கடுமையாக எதிர்வினையாற்றினர். அ.தி.மு.க மூத்த தலைவர் ஜெயக்குமார், பா.ஜ.க அ.தி.மு.க கூட்டணியில் இல்லை என்று கூறினார். 
இதையடுத்து, தமிழக பா.ஜ.க தலைவர் அண்ணாமலை தான் அண்ணா குறித்து கூறிய நிகழ்ச்சி பற்றிய செய்தி தி இந்து செய்தித்தாளில் வெளியானது என்று தனது பேச்சுக்கு ஆதாரம் இருப்பதாகக் கூறி உறுதிப்படுத்தினார்.

இந்நிலையில்,  1956 மதுரை நிகழ்ச்சியில், அண்ணா - முத்துராமலிங்கத் தேவர் இடையே உண்மையில் என்ன நடந்தது என்று அன்றைக்கு இந்து ஆங்கில நாளிதழில் பிரசுரமான செய்தி வெளியாகி உள்ளது.

மே 31 - ஜூன் 4, 1956-ல் ‘தி இந்து; நாளிதழில் வெளியிடப்பட்ட அறிக்கைகளை ஆய்வு செய்ததில் மதுரைத் தமிழ்ச் சங்கத்தின் பொன்விழாவின் நான்காவது நாளில் (ஜூன் 2) தேவர் அண்ணாதுரையின் பேச்சுக்கு விதிவிலக்கு அளித்தார். ஆனால், ஜூன் 4, 1956-ல் வெளியிடப்பட்ட செய்தியிலோ அல்லது அதற்குப் பிறகு தி.மு.க நிறுவனர் வருத்தம் தெரிவித்ததாகவோ அல்லது மன்னிப்புக் கேட்டதாகவோ எந்தக் குறிப்பும் இல்லை என்று தெரிவிக்கப்பட்டுள்ளது.

மதுரை தமிழ்ச்சங்கத்தின் பொன்விழா ஏற்பாட்டாளர்களை, வகுப்புவாத அமைப்புகளின் தலைவர்கள் தங்கள் உணர்வுகளை வெளிக்கொணர ஒரு கோவிலின் அரங்கில் நடத்திய கூட்டத்தில் தேவர் கடுமையான கண்டனம் தெரிவித்ததாக அந்தச் செய்தியில் குறிப்பிடப்பட்டுள்ளது. நீதிக்கட்சியின் முக்கிய தலைவர்களில் ஒருவரும் முன்னாள் முதலமைச்சருமான பி.டி. ராஜன் (ஏப்ரல் முதல் ஆகஸ்ட் 1936) மதுரை தமிழ்ச்சங்கத்தின் பொன்விழா கொண்டாட்டக் குழுவின் தலைவராக இருந்தார்.

ஸ்ரீ மீனாட்சி அம்மன் கோயில் கொண்டாட்டத்தின் மூன்றாம் நாள் (ஜூன் 1) அன்று அண்ணாதுரை கூறிய “நாத்திக பேச்சுகளை” தேவர் குறிப்பிட்டார். தி.மு.க தலைவரின் உரையின் உள்ளடக்கத்தை விவரிக்காமல் செய்தி தெரிவித்துள்ளது. முந்தைய நாள் அண்ணாதுரை “பொதுப் பேச்சு” என்ற தலைப்பில் பேசினார். மற்ற பேச்சாளர்களும் இருந்தனர். மேலும், அவர்களில் தமிழ் அறிஞர்களான இரா.பி. சேதுப்பிள்ளை மற்றும் அவ்வை துரைசுவாமி ஆகியோர் அடங்குவர். அவர்கள்  ‘தமிழ் கலாச்சாரம்’ மற்றும்  ‘பண்டைய தமிழர்களின் மதம்’ என்ற தலைப்பில் தங்கள் உரைகளை நிகழ்த்தினர்.

தேவர் எழுந்ததும் முதலில் பேச அனுமதிக்கப்படவில்லை என்றும், பார்வையாளர்களிடம் முதலில் பேச அனுமதிக்குமாறு ஏற்பாட்டாளர்களை வற்புறுத்தியது பற்றியும் செய்தி கூறுகிறது. " “அவரது கோரிக்கை நிராகரிக்கப்பட்டதால், சிறிது குழப்பம் ஏற்பட்டது. பார்வையாளர்களில் ஒரு பகுதியினர் சத்தம் போட்டனர்” என்று அந்த செய்தி கூறுகிறது. இதையடுத்து, ஏற்பாட்டாளர்கள் அவரை பேச அனுமதித்தனர் என்று அந்த செய்தி கூறுகிறது.

மற்றொரு சர்ச்சை

இந்த கொண்டாட்டத்துடன் தொடர்புடைய மேலும் ஒரு சர்ச்சை இருந்தது,  ‘ஏழு நாள் விவகாரம்” பற்றி  மே 31-ல் மற்றொரு செய்தியின் படி, மே 30 அன்று தமுக்கம் மைதானத்தில் விழாவைத் தொடக்கிவைத்த சி. ராஜகோபாலாச்சாரி (சி.ஆர் அல்லது ராஜாஜி) 1954-ம் ஆண்டு முதலமைச்சர் பதவியைத் துறந்தார். “அதாவது தமிழ் மொழி மற்றும் இலக்கியத்தின் வளர்ச்சி, சாதி மற்றும் வகுப்புவாத வேறுபாடுகளைத் தவிர்த்து, தமிழ்ச் சங்கத்தின் பொது நோக்கத்திற்காக உழைக்க வேண்டும்” என்று மாநில மக்களுக்கு வேண்டுகோள் விடுத்தார். ” என்று மே 31-ம் தேதி வெளியான செய்தி கூறியது.

மேலும், “ஆரியர்களும் திராவிடர்களும் இரு வேறு பிரிவுகளைச் சேர்ந்தவர்கள் என்பது அவரது மாணவர் நாட்களில் அவருக்கு (ராஜாஜிக்கு) கற்பிக்கப்பட்டது. அவர் தனது மாணவர் நாட்களில் பயன்படுத்திய புத்தகங்கள் பழங்கால புத்தகங்கள் மற்றும் அர்த்தமற்றவை. துரதிர்ஷ்டவசமாக, சிலர் அந்த யோசனைகளை உறுதியாகக் கடைப்பிடித்து, தவறான வழிகளில் செல்கிறார்கள்” என்று அந்த செய்தி கூறுகிறது.

ஆரியர்கள் மற்றும் திராவிடர்கள் பற்றிய அவரது குறிப்பு, அடுத்தடுத்த பேச்சாளர்களிடமிருந்து விமர்சனத்திற்கு உட்பட்டது. ஃபார்வர்ட் பிளாக்கின் தலைவர், அவரது பதிலில், ராஜாஜியின் கருத்துக்களை விமர்சிப்பதில் பேச்சாளர்களின் முறையற்ற தன்மை குறித்தும் பேசினார். ஜூன் 4-ல் வெளியான செய்தியில் ஒரு குறிப்புடன் முடிந்தது, “பின்னர் முத்துராமலிங்க தேவர் மேடையை விட்டு வெளியேறினார், எந்த அசம்பாவிதமும் இன்றி கூட்டம் நடந்தது.” என்று குறிப்பிடப்பட்டுள்ளது.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“

நடிகர் விஷால், எஸ்.ஜே.சூர்யா நடிப்பில் உருவாகியுள்ள படம் மார்க் ஆண்டனி. இதனை ஆதிக் ரவிச்சந்திரன் இயக்கியுள்ளார். மேலும் படத்தில் சுனில், செல்வராகவன், கிங்ஸ்லி, ஒய்.ஜி.மகேந்திரன், ரிது வர்மா, அபிநயா உள்ளிட்ட பலர் நடித்துள்ளனர். 

படத்துக்கு ஜி.வி.பிரகாஷ்குமார் இசையமைத்துள்ளார். வினோத்குமார் தயாரித்துள்ளார். டைம் டிராவலை அடிப்படையாகக் கொண்டு படத்தின் கதை உருவாக்கப்பட்டுள்ளது. 

செப்.15ஆம் தேதி வெளியான மார்க் ஆண்டனி படம் நல்ல வரவேற்பினை பெற்று வருகிறது. குறிப்பாக எஸ்.ஜே. சூர்யா நடிப்பினை பலரும் பாராட்டி வருகிறார்கள்.

இதையும் படிக்க: திருமணமா? பதிலளித்த த்ரிஷா!

இப்படம் வெளியான 5 நாள்களில் உலகளவில் ரூ.62.11 கோடியை வசூலித்துள்ளதாக தயாரிப்பாளர் வினோத் தெரிவித்துள்ளார்.

இந்நிலையில், இன்று படத்தின் வெற்றிவிழாவில் பங்கேற்ற இயக்குநர் ஆதிக் ரவிச்சந்திரன், “ நேர்கொண்ட பார்வை படப்பிடிப்பின்போது அஜித் சாரை சந்தித்தபோது, ‘உன்னால் முடியும். நீ பெரிய படத்தை இயக்கு’ என நம்பிக்கை அளித்தது அவர்தான். மார்க் ஆண்டனியின் வெற்றியை அஜித் சாருக்கு சமர்பிக்கிறேன்” எனக் கூறினார்.