தமிழ்நாட்டில் ஏப்ரல் 19-ம் தேதி நடைபெற்ற மக்களவைத் தேர்தல் வாக்குப்பதிவு மாலை 6 மணியுடன் நிறைவைடந்த நிலையில், தமிழகத்தில் 72.09% வாக்குகளைத் தாண்டி பதிவாகியுள்ளது. தமிழ்நாட்டில் அதிகபட்சமாக தருமபுரி மக்களவைத் தொகுதியில், 81.40%, கள்ளக்குறிச்சியில் 75.67% வாக்குகள் பதிவாகி டாப்பில் உள்ளன.

நாடு முழுவதும் மக்களவைத் தேர்தல் ஏப்ரல் 19-ம் தேதி தொடங்கி ஜூன் 1-ம் தேதி வரை 7 கட்டங்களாக நடைபெறுகிறது. ஜூன் 4-ம் தேதி பதிவான வாக்குகள் எண்ணப்பட்டு அன்றே முடிவுகள் அறிவிக்கப்பட உள்ளன.

ஏப்ரல் 19-ம் தேதி தமிழ்நாடு, புதுச்சேரி உள்ளிட்ட 21 மாநிலங்களில் முதல் கட்ட மக்களவைத் தேர்தல் வாக்குப்பதிவு நடைபெற்றது. தமிழ்நாட்டில் 39 மக்களவைத் தொகுதிகளிலும் புதுச்சேரி 1 தொகுதியிலும் மக்களவைத் தேர்தல் வாக்குப்பதிவு மாலை 6 மணியுடன் அமைதியான முறையில் நடந்து முடிந்தது. மாலை 6 மணிக்குள் வாக்குச்சாவடிக்கு வந்த வாக்காளர்களுக்கு வாக்குச்சாவடி அலுவலர்களால் டோக்கன் வழங்கப்பட்டு, வாக்களிக்க ஏற்பாடு செய்யப்பட்டது. தமிழ்நாட்டில் இரவு 7 மணி வரை 72.09% வாக்குகள் பதிவானது. அதிகபட்சமாக கள்ளக்குறிச்சி தொகுதியில் 75.67% வாக்குகளும், தருமபுரியில் 75.44% பதிவானதாக முதலில் அறிவிக்கப்பட்டது. மேலும், இதையடுத்து, தமிழ்நாட்டில் கடைசி 1 மணி நேரத்தில் மட்டும் 10% வாக்குகள் பதிவானது. இதையடுத்து, தமிழ்நாட்டில் அதிகபட்சமாக தருமபுரி மக்களவைத் தொகுதியில் 81.40% வாக்குகள் பதிவானதாக தகவல்கள் வெளியானது.

தமிழ்நாட்டில் 39 மக்களவைத் தொகுதிகளில் பதிவான வாக்குகள் சதவீதம் வருமாறு:

தருமபுரி - 81.40%

கள்ளக்குறிச்சி - 75.67%

சிதம்பரம் - 74.87%

பெரம்பலூர் - 74.46%

நாமக்கல் - 74.29%

கரூர் - 74.05%

அரக்கோணம் - 73.92%

ஆரணி - 73.77%

சேலம் - 73.55%

விழுப்புரம் - 73.49%

திருவண்ணாமலை - 73.35%

வேலூர் -73.04%

காஞ்சிபுரம் - 72.99%

கிருஷ்ணகிரி - 72.96%

கடலூர் - 72.40%

விருதுநகர் - 72.29%

பொள்ளாச்சி - 72.22%

நாகப்பட்டினம் - 72.21%

திருப்பூர் - 72.02%

திருவள்ளூர் - 71.87%

தேனி - 71.74%

மயிலாடுதுறை - 71.45%

ஈரோடு - 71.42%

திண்டுக்கல் - 71.37%

திருச்சி - 71.20%

கோயம்புத்தூர் - 71.17%

நீலகிரி - 71.07%

தென்காசி - 71.06%

சிவகங்கை - 71.05%

ராமநாதபுரம் - 71.05%

தூத்துக்குடி - 70.93%

திருநெல்வேலி - 70.46%

கன்னியாகுமரி - 70.15%

தஞ்சாவூர் - 69.82%

ஸ்ரீபெரும்பதூர் - 69.79%

வட சென்னை - 69.26%

மதுரை - 68.98%

தென் சென்னை - 67.82%

மத்திய சென்னை - 67.35%

தமிழ்நாட்டில் அதிகபட்சமாக தருமபுரி மக்களவைத்தொகுதியில் 81.40% வாக்குகளும் கள்ளக்குறிச்சிய்ல் 75.67% வாக்குகளும் பதிவாகி டாப்பில் உள்ளன. குறைந்தபட்சமாக மத்திய சென்னை மக்களவைத் தொகுதியில், 67.37% வாக்குகள் பதிவாகி உள்ளன.

இதனிடையே, தமிழ்நாடு தேர்தல் அதிகாரி சத்ய பிரதா சாஹூ செய்தியாளர்களைச் சந்தித்து தமிழ்நாட்டில் மக்களவைத் தேர்தல் வாக்குப்பதிவு நிலவரம் பற்றி பேசினார். அப்போது அவர் கூறியதாவது: 
“இரவு 7 மணி நிலவரப்படி தமிழ்நாடு முழுவதும் 72.09 சதவீதம் வாக்குகள் பதிவாகி உள்ளன. இன்னும் பல வாக்குச்சாவடிகளில் மக்கள் டோக்கன் வாங்கிக்கொண்டு வரிசையில் நின்று கொண்டிருக்கின்றனர். எனவே வாக்குப்பதிவு சதவீதம் இன்னும் உயரும்.

அதிகபட்சமாக கள்ளக்குறிச்சி தொகுதியில் 75.67 சதவீதமும், தர்மபுரியில் 75.44 சதவீதமும், சிதம்பரத்தில் 74.87 சதவீதமும் வாக்குகள் பதிவாகி இருந்தன. குறைந்தபட்சமாக மத்திய சென்னையில் 67.35 சதவீத வாக்குகள் பதிவாகி இருந்தன.

சென்னையில் நல்ல முன்னேற்றம் ஏற்பட்டுள்ளது. வெயிலை தவிர்க்க மாலை 3 மணிக்கு பிறகு மக்கள் வந்து அதிகமாக வாக்களித்துள்ளனர். மக்கள் ஆர்வத்துடன் வந்து வாக்களித்தனர்.

இந்த எண்ணிக்கையில் தபால் ஓட்டுகள் சேர்க்கப்படவில்லை. என்றாலும், முழுமையான வாக்குப்பதிவு அளவு நாளை (இன்று) காலை 11 மணிக்கு மேல் தெரிய வரும்.

கடந்த 2019-ம் ஆண்டு நாடாளுமன்ற தேர்தலில் 7 மணி நிலவரப்படி 69.55 சதவீத வாக்குகள் பதிவாகி இருந்தன. அப்போது அதிகபட்சமாக தருமபுரியில் 82.41 சதவீதமும், குறைந்தபட்சமாக தென் சென்னையில் 57.07 சதவீதம் வாக்குகளும் பதிவாகி இருந்தன.

மறு தேர்தல் நடத்துவது பற்றிய தகவல்கள் நாளைதான் தெரிய வரும். அந்தந்த வாக்குச்சாவடி தலைமை அலுவலர்கள், தேர்தல் பார்வையாளர்கள் ஆகியோர் ஆய்வு செய்து அறிக்கை தருவார்கள். பின்னர் அதுபற்றி முடிவு செய்யப்படும். மறு தேர்தலுக்கு ஒரு கட்சி மட்டும் கோரிக்கை விடுத்துள்ளது. அதுபற்றி மாவட்ட தேர்தல் அதிகாரியின் அறிக்கை பெறப்படும்.

தமிழகத்தில் ஒட்டுமொத்தமாக பார்க்கும்போது மிகவும் சுமுகமாகவும், அமைதியாகவும், பெரிய சட்டம்-ஒழுங்கு பிரச்சினை இல்லாமலும் தேர்தல் நடந்து முடிந்துள்ளது. சின்னச்சின்ன வாக்குவாதங்கள்தான் சில இடங்களில் நடந்தன. பெரிய சம்பவங்கள் எதுவும் நடக்கவில்லை.

வாக்குப்பதிவு எந்திரங்களின் செயல்பாடும் நன்றாக இருந்தது. மிகக் குறைவான இடங்களில் மட்டும் மாற்று எந்திரங்கள் வைக்கப்பட்டன. சில இடங்களில் பழுது பார்த்து சரி செய்யப்பட்டன.

தேர்தல் புறக்கணிப்பு செய்யப்பட்டது பற்றி சற்று ஆழமாக ஆய்வு செய்து பார்க்க வேண்டும். அதற்கான சூழ்நிலை எது என்பதை கண்டறிய வேண்டும். வாக்காளர்கள், அனைத்து அரசியல் கட்சிகள், அரசு ஊழியர்கள் நன்றாக ஒத்துழைத்தனர்.” என்று கூறினார்.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“

ஜனநாயக கடமையை நிறைவேற்ற  104 வயது முதியவர் தனது மகன் மற்றும் பேரன் கொள்ளு பேரன்களுடன் வந்து வாக்களித்தார்.

18-வது மக்களவை தேர்தல் முதல் கட்டமாக தமிழகத்தில் இன்று ஒரே கட்டமாக நடைபெற்றுது. 7 மணி முதல் வாக்காளர்கள் ஆர்வமுடன் நின்று வாக்களித்தனர்.

இந்த தேர்தலில் அனைவரும் வாக்களிக்கும் வகையில் தேர்தல் ஆணையம் பல்வேறு நடவடிக்கைகளை மேற்கொண்டது மேலும், வாக்களிக்க வாக்கு சாவடிக்கு வர இயலாத முதியவர்களின் இல்லத்திற்கே சென்று தபால் வாக்கை பெற்றது

இந்நிலையில், கோவை மக்களவை தேர்தலில் தனது ஜனநாயக கடமையை நிறைவேற்ற  104 வயது முதியவர் தனது மகன் மற்றும் பேரன் கொள்ளு பேரன்களுடன் வந்து வாக்களித்துள்ளார்.

கோவை மாவட்டம், கணியூர் அடுத்த ஊஞ்சபாளையம் கிராமத்தை சேர்ந்தவர் விவசாயி  கணபதி கவுண்டர், இவர் தனது 104 வது வயதில் மகள், பேரன், கொள்ளு பேரன்களுடன் வந்து கோவை மக்களவைத் தேர்தலில் தனது வாக்கினை பதிவு செய்தார்.

முன்னதாக வீட்டில் இருந்து காரில் வந்த கணபதி வாக்கு சாவடிக்கு சென்று வாக்களித்தது அங்கிருந்தவர்களுக்கு வியப்பை ஏற்படுத்தியது. 

தான் 21-வயதில் இருந்து வாக்களித்து வருவதாகவும் இதுவரை எந்த ஒரு தேர்தலிலும் வாக்களிக்க தவறியது இல்லை வெளியூர் சென்றிருந்தாலும் வாக்குப்பதிவு அன்று வந்து தனது ஜனநாயக கடமையை நிறைவேற்றி உள்ளதாகவும் அனைவரும் வாக்களித்து தங்களுடைய ஜனநாயக கடமையை நிறைவேற்ற வேண்டுமென கணபதி வேண்டுகோள் விடுத்தார்.

கோவை மக்களவைத் தொகுதியில் 64.42% வாக்குப்பதிவு

2024 மக்களவைத் தேர்தல் இன்று காலை 7 மணிக்கு தொடங்கி மாலை 6 மணியுடன் நிறைவடைந்தது. கோவை மக்களவைத் தொகுதியிலும் காலை 7 மணிக்கு வாக்குப்பதிவு தொடன்கி மாலை 6 மணியுடன் நிறைவடைந்தது. கோவை மக்களவைத் தொகுதியில் 2059 வாக்குச்சாவடிகளில் நடைபெற்ற வாக்குப்பதிவு சதவிகிதம் தற்பொழுது வெளியிடப்பட்டுள்ளது.

அதன்படி கோவையில் உள்ள ஆறு சட்டமன்ற தொகுதிகளையும் சேர்த்து 64.42% வாக்குப்பதிவு பதிவாகியுள்ளது. சட்டமன்ற தொகுதிகள் விவரங்களின்படி சூலூர் சட்டமன்ற தொகுதியில் 75.33%, கவுண்டம்பாளையம் சட்டமன்ற தொகுதியில் 66.42%, கோவை வடக்கு சட்டமன்றத் தொகுதியில் 58.74%, கோவை தெற்கு சட்டமன்ற தொகுதியில் 59.25%, சிங்காநல்லூர் சட்டமன்ற தொகுதியில் 59.33%, பல்லடம் சட்டமன்ற தொகுதியில் 67.42% வாக்குப்பதிவு பதிவாகியுள்ளது.

கோவை, தடாகம் சாலையில் உள்ள ஜி.சி.டி கல்லூரியில் வாக்கு எண்ணும் மையம் கோவை மக்களவைத் தொகுதிக்கு ஒதுக்கப்பட்டுள்ளது.

வாக்குப்பதிவு நிறைவடைந்தை ஒட்டி வாக்கு இயந்திரங்களுக்கு சீல் வைக்கும் பணி தீவிரமாக நடைபெற்றது. தேர்தல் அதிகாரி முன்னிலை சீல் வைத்த பிறகு, காவல்துறையினர் மற்றும் மத்திய பாதுகாப்பு படையினருடன் கோவை தடாகம் சாலையில் உள்ள ஜி.சி.டி அரசு கல்லூரிக்கு எடுத்துச் செல்லும் பணி மேற்கொள்ளப்பட்டு வருகிறது என்பது குறிப்பிடத்தக்கது.

செய்தி: பி. ரஹ்மான்

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“

மயிலாடுதுறையில் இரண்டு வாக்குச்சாவடிகளில் 200க்கும் மேற்பட்ட வாக்காளர்களின் பெயர்கள் நீக்கப்பட்டுள்ளதால் கோபமடைந்த வாக்காளர்கள் சாலைமறியல் போராட்டத்தில் ஈடுபட்டதால் பெரும் பரபரப்பு ஏற்பட்டுள்ளது.
    
மயிலாடுதுறை மகாதானத்தெருவில் உள்ள 143 மற்றும் 144 ஆகிய வாக்குச்சாவடிகளில் இன்று காலை வழக்கம் போல் 7 மணிக்கு வாக்குப்பதிவு தொடங்கியது. அப்பகுதியில் உள்ள வாக்காளர்கள் ஆர்வமுடன் வாக்குச்சாவடிகளுக்கு வந்தனர். அப்படி வந்தவர்களில் பலர் பெயர்கள் வாக்காளர் பட்டியலில் இல்லை என்று அதிகாரிகள் கூறி திருப்பி அனுப்பினர். இப்படி சுமார் 200 பேருக்கு மேல் வாக்காளர் பட்டியலில் பெயரில்லை என்று கூறப்பட்டதால் அந்த வாக்காளர்கள் தேர்தல் அதிகாரிகளிடம் வாக்குவாதத்தில் ஈடுபட்டனர். 
    
இதனால் அங்கு பெரும் பரபரப்பு ஏற்பட்டது. இந்த இரண்டு வாக்கு சாவடிகளிலும் 1,189 வாக்காளர்கள் உள்ளனர். இவர்கள் கடந்த சட்டப்பேரவைத் தேர்தல், உள்ளாட்சி தேர்தல்களில் வாக்களித்துள்ளனர். இந்நிலையில், இன்று வாக்களிக்க வந்த மக்கள் பெரும்பாலோனோரின் பெயர்கள் வாக்காளர்  பட்டியலில் இருந்து நீக்கப்பட்டுள்ளதாக அதிகாரிகள் தெரிவித்துள்ளனர்.

வாக்காளர் பட்டியலில் இருந்து சுமார் 200 க்கும் மேற்பட்டவர்களின் வாக்குகள் நீக்கப்பட்டுள்ளதை அறிந்த அப்பகுதி மக்கள் வாக்குச்சாவடி முன்பு சாலை மறியல் போராட்டத்தில் ஈடுபட்டனர். மேலும், பாமக, அதிமுக, தி.மு.க கட்சி நிர்வாகிகள் அப்பகுதியில் கூடினர். தகவலறிந்த பா.ம.க வேட்பாளர் ம.க.ஸ்டாலின் தலைமையில் பா.ம.க, பாஜக கட்சியினர் வாக்குச்சாவடி முன்பு சாலை மறியலில் ஈடுபட்டனர்.
    
அவர்களிடம் வருவாய் கோட்டாட்சியரும், தேர்தல் நடத்தும் அலுவலருமான யுரேகா, மாவட்ட துணை ஆட்சியர் ஷபீர்ஆலம், டி.எஸ்.பி திருப்பதி ஆகியோர் பேச்சுவார்த்தை நடத்தினர்.  பா.ம.க வேட்பாளர் ம.க.ஸ்டாலின் இது குறித்து புகார் மனுவை அளித்தார். பெயர் நீக்கம் செய்யப்பட்டுள்ள அனைத்து வாக்காளர்களும் வாக்களிக்க ஏற்பாடு செய்ய வேண்டுமென்று அவர் கேட்டுக் கொண்டார். 
   
பொதுமக்களின் திடீர் போராட்டம் மற்றும் அரசியல் கட்சியினர் அப்பகுதியில் திரண்டுள்ளதை அடுத்து  அசம்பாவிதம் நேரிடாமல் தடுக்கும் வகையில் மத்திய ரிசர்வ் படை, தமிழக மற்றும் கேரள போலீஸார் உள்ளிட்ட 80-க்கும் மேற்பட்டோர் பாதுகாப்புப் பணியில் ஈடுபட்டு வருகின்றனர்.

செய்தி: க. சண்முகவடிவேல்

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“

kushbhu | Lok Sabha Election 2024: தமிழில் உச்ச நட்சத்திரமாக இருந்தவர் நடிகை குஷ்பு. அரசியலில் கால் பதித்த இவர் காங்கிரஸ் கட்சியில் இணைந்தார். கருத்து வேறுபாடு காரணமாக அக்கட்சியில் இருந்து விலகிய அவர் தற்போது பா.ஜ.க-வில் சேர்ந்து  தீவிரமாக இயங்கி வருகிறார். 

இந்நிலையில், இன்று வெள்ளிக்கிழமை நாடாளுமன்ற மக்களவைத் தேர்தல் வாக்குப்பதிவை முன்னிட்டு தனது குடும்பத்துடன் சென்னையில் தனது வாக்கினை செலுத்தினார் குஷ்பு. சென்னை பட்டினம்பாக்கத்தில் உள்ள வாக்குச்சாவடியில் வாக்களித்த குஷ்பு, பின்னர் தேர்தல் ஆணையம் வைத்திருந்த தேர்தல் விழிப்புணர்வு செல்பி ஸ்டாண்டில் குஷ்பு தனது கணவருடன் புகைப்படம் எடுத்தார். 

இந்த புகைப்படங்களை தனது எக்ஸ் பக்கத்தில் பதிவிட்ட அவர், "நாங்கள் எங்கள் கடமையைச் செய்துவிட்டோம். நீங்களும் செய்யுங்கள்" என்று குறிப்பிட்டு #GoAndVote #Duty #Vote4INDIA, #VoteFor400Paar என்ற ஹேஷ்டேக்குளை பதிவிட்டார். அதில், #Vote4INDIA என்ற இந்தியா கூட்டணியின் ஹேஸ்டேக்கை பயன்படுத்தியுள்ளார். இதனைப் பார்த்த பா.ஜ.க-வினர் கடும் அதிர்ச்சியடைந்துள்ளனர்.   

இந்த நிலையில், இந்த விவகாரம் தொடர்பாக நடிகை குஷ்பு விளக்கமளித்துள்ளார். இதுகுறித்து அவர் பேசுகையில், "நான் ஒருபோதும் இந்தியா கூட்டணியை ஆதரித்ததே இல்லை. என்னுடைய நாட்டை குறிப்பிட்டே #Vote4INDIA என்று பதிவிட்டேன். நான் தெளிவாக இருக்கிறேன். குழப்பத்தை விளைவிக்க வேண்டும் என்று நினைப்பவர்கள் இவ்வாறு கூறி வருகின்றனர். நான் இன்னும் பா.ஜகவில் தான் இருக்கிறேன்." என்று விளக்கம் அளித்துள்ளார். 

#Vote4INDIA என்கிற இந்தியா கூட்டணி ஹேஷ்டேக்கை பயன்படுத்தியது தொடர்பாக தி.மு.க மற்றும் காங்கிரஸ் கட்சிகளைச் சேர்ந்தவர்கள் நடிகை  குஷ்புவை கலாய்த்து வருவது குறிப்பிடத்தக்கது. 

We have exercised our duty, have you? #GoAndVote#Duty#Vote4INDIA #VoteFor400Paar pic.twitter.com/B9G0BoCMqX

— KhushbuSundar (Modi ka Parivaar) (@khushsundar) April 19, 2024

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற  https://t.me/ietamil“

பிரதமர்கள் அருங்காட்சியகம் மற்றும் நூலகம் (பி.எம்.எம்.எல் - PMML) - முன்பு நேரு நினைவு அருங்காட்சியகம் & நூலகம் அல்லது (என்.எம்.எம்.எல் - NMML) நன்கொடையாக வழங்கப்பட்ட முன்னாள் பிரதமர் ஜவஹர்லால் நேருவின் ஆவணங்கள் உட்பட, அதன் சேகரிப்பில் உள்ள தனியார் ஆவணங்களின் உரிமை மற்றும் பாதுகாவலர் குறித்து சட்டக் கருத்தைப் பெற திட்டமிட்டுள்ளது. 1971க்குப் பிறகு இந்திரா காந்தியாலும் பின்னர் சோனியா காந்தியாலும் நன்கொடையாக வழங்கப்பட்டது என்று தி இந்தியன் எக்ஸ்பிரஸ்-க்கு தெரியவந்துள்ளது.

ஆங்கிலத்தில் படிக்க: Years after Sonia Gandhi took Nehru papers, PM museum set to seek view on ownership

இது பிப்ரவரியில் பாதுகாப்பு அமைச்சர் ராஜ்நாத் சிங் தலைமையில் நடைபெற்ற பி.எம்.எம்.எல்-ன் வருடாந்திர பொதுக் கூட்டத்தை (ஏ.ஜி.எம்) தொடர்ந்து நடத்துகிறது. அப்போது, விவாதத்தின் பெரும்பகுதி பி.எம்.எம்.எல்-ன் சேகரிப்பில் நேருவின் தனிப்பட்ட ஆவணங்களை மையமாகக் கொண்டது, அதில் 51 பெட்டிகள் மே 2008 இல் காங்கிரஸ் தலைவர் சோனியா காந்தியால் திரும்பப் பெறப்பட்டது.

பிப்ரவரி 13-ல் நடைபெற்ற பொதுக் கூட்டத்தில், நிதியமைச்சர் நிர்மலா சீதாராமன் மற்றும் கல்வி அமைச்சர் தர்மேந்திர பிரதான் உள்ளிட்ட பிற உறுப்பினர்கள் கலந்துகொண்ட சோனியா காந்தியின் தனிப்பட்ட ஆவணங்களின் ஒரு பகுதியை சோனியா காந்தி மீட்டெடுத்தது குறித்து விரிவாக விவாதிக்கப்பட்டது.

கூட்டத்தின் போது, உறுப்பினர்களால் உள்விசாரணை செய்யப்பட்டது, மார்ச் 2008-ல் எம்.வி. ராஜன், நேரு சேகரிப்பில் உள்ள தனிப்பட்ட ஆவணங்கள் மற்றும் அதிகாரப்பூர்வ ஆவணங்கள் மற்றும் அனைத்து தனிப்பட்ட ஆவணங்களையும் பிரிப்பதற்காக பி.எம்.எம்.எல் (சோனியா காந்தி சார்பாக) சென்றது தெரியவந்தது. அவரால் அடையாளம் காணப்பட்ட ஆவணங்கள் 51 பெட்டிகளில் சோனியா காந்திக்கு மே 5, 2008 அன்று அனுப்பப்பட்டன.

சில உறுப்பினர்கள் அந்த ஆவணங்கள் அனைத்தையும் திரும்பப் பெற வேண்டும் என்று கருதினாலும், அவற்றின் சட்டப்பூர்வ நிலை குறித்து தெளிவு இல்லை. உடைமையாளர் உரிமை, பாதுகாவலர் உரிமை, காப்புரிமை, மற்றும் இந்த ஆவணக் காப்பக சேகரிப்புகளின் பயன்பாடு” போன்ற சிக்கல்களில் சட்டக் கருத்தைப் பெற ஒருமித்த கருத்து எட்டப்பட்டது.

என்.எம்.எம்.எல் ஆவணங்களின்படி, சோனியா காந்தி மீட்டெடுத்த ஆவணங்களில் நேரு மற்றும் ஜெயப்பிரகாஷ் நாராயண், எட்வினா மவுண்ட்பேட்டன், ஆல்பர்ட் ஐன்ஸ்டீன், அருணா ஆசப் அலி, விஜய லக்ஷ்மி பண்டிட் மற்றும் ஜக்ஜீவன் ராம் ஆகியோருக்கு இடையே பரிமாறப்ப்பட்ட கடிதங்கள் உள்ளன.

நேரு உள்ளிட்டோரின் தனியார் ஆவணங்களின்  “உடைமையாளர்களின் உரிமை, பாதுகாவலர் உரிமை மற்றும் காப்புரிமை” பற்றிய சட்டக் கருத்தைப் பெற பி.எம்.எம்.எல் -ன் முடிவு குறித்து சோனியா காந்தியின் அலுவலகத்திற்கு மின்னஞ்சல் அனுப்பப்பட்ட கேள்விகளுக்கு பதிலைப் பெறவில்லை.

நேரு ஆவணங்கள் பி.எம்.எம்.எல்-ஆல் பெறப்பட்ட தனிப்பட்ட ஆவணங்களின் முதல் தொகுப்பாகும், மேலும் அவரது சட்டப்பூர்வ வாரிசான இந்திரா காந்தியின் சார்பாக என்.எம்.எம்.எல்-ன் அதே தீன் மூர்த்தி வளாகத்தில் அமைந்துள்ள ஜவஹர்லால் நேரு நினைவு நிதி (ஜே.என்.எம்.எஃப்) மூலம் மாற்றப்பட்டது. 1984-ல் அவர் இறக்கும் வரை இந்த ஆவணங்களின் உரிமையாளராக இருந்தார். அவரது ஆணையின்படி, ஆவணங்கள் ஒரு முழுமையான பரிசாக இல்லாமல் பாதுகாப்பதற்காகவே இருந்தன,. எனவே அவரது அனுமதியின்றி அவற்றை ஆய்வாளர்களுக்கு வெளிப்படுத்த முடியாது.

பின்னர், 1946 காலகட்டத்திற்குப் பிந்தைய காலகட்டத்திற்குப் பிந்தைய நேரு ஆவணங்களின் கணிசமான தொகுப்பும் சோனியா காந்தியால் பி.எம்.எம்.எல்-க்கு வழங்கப்பட்டது, மேலும் இந்த ஆவணங்கள் பாதுகாப்பான காவலுக்கு மட்டுமே என்று அவர் மீண்டும் வலியுறுத்தினார் என்று தி இந்தியன் எக்ஸ்பிரஸ் தெரிவித்துள்ளது. இந்திரா காந்தியின் மரணத்திற்குப் பிறகு, சோனியா காந்தி முன்னாள் சட்டப்பூர்வ வாரிசுகளின் அறங்காவலர்-பாதுகாவலராக இருந்தார்.

பி.எம்.எம்.எல் நாட்டிலேயே மிகப்பெரிய தனியார் ஆவணங்களின் தொகுப்பைக் கொண்டுள்ளது, இது முதலில் நவீன இந்தியாவின் சுமார் 1,000 ஆளுமைகளைச் சேர்ந்தது. அதன் தலைமையின் முழு பரப்பையும் உள்ளடக்கியது. அதன் காப்பகங்களில் 1861-ம் ஆண்டு முதல் டெல்லியில் பதிவு செய்யப்பட்ட எஃப்.ஐ.ஆர்-களின் விவரங்கள் உள்ளன. இந்த தாள்களில் பல மைக்ரோஃபில்மில் உள்ளன, மற்றவை காகித ஆவணங்கள். தனிப்பட்ட ஆவணங்களின் பல்வேறு தொகுப்புகள் நிறுவனத்திடம் ஒப்படைக்கப்பட்டபோது, அந்தந்த நன்கொடையாளர்களால் அவற்றின் வகைப்படுத்தலுக்கு நிபந்தனைகள் விதிக்கப்பட்டன - அவை சில சந்தர்ப்பங்களில் 30-35 ஆண்டுகள் வரை சென்றது, அல்லது அந்த பொருள் உயிருடன் இருக்கும் காலம் வரை சென்றது.

நன்கொடையாளர்களால் அடிக்கடி விதிக்கப்படும் தனியார் ஆவணங்களை வெளியிடுவதற்கான தடை காலவரையின்றி இருக்கக்கூடாது என்றும், உச்ச வரம்பு ஏற்படுத்தப்பட வேண்டும் என்றும் பெரும்பான்மையான உறுப்பினர்கள் கருதுவதாக பி.எம்.எம்.எல்-ன் வட்டாரங்கள் தெரிவித்தன. நன்கொடையாளர்களால் விதிக்கப்படும் பொருளாதாரத் தடை விவகாரம், பி.எம்.எம்.எல் சட்டக் கருத்தைத் தேடும் பிரச்சினைகளில் ஒன்றாக இருக்கும்.

அருங்காட்சியகத்தின் பெயரிலிருந்து நேருவின் பெயர் நீக்கப்பட்டு, பிரதம மந்திரிகள் அருங்காட்சியகம் & நூலகம் என மறுபெயரிடப்பட்ட பிறகு, பிப்ரவரியில் நடைபெற்ற முதல் வருடாந்திர பொதுக் கூட்டம் முதல் முறையாக நடத்தப்பட்டது.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“

Rahul Gandhi | Mamata Banerjee | Lok Sabha Election 2024: நாடாளுமன்ற மக்களவைத் தேர்தலின் முதல் கட்ட வாக்குப்பதிவு இன்று வெள்ளிக்கிழமை முதல் தொடங்கி நடைபெற்றது. மேற்கு வங்கத்தில் 3 தொகுதிகளுக்கு வாக்குப்பதிவு நடந்த நிலையில், இந்தியா கூட்டணியில் இடம் பெற்றுள்ள காங்கிரஸ் மற்றும் இந்திய கம்யூனிஸ்ட் கட்சி (மார்க்சிஸ்ட்) (சி.பி.ஐ(எம்)) ஆகிய கட்சிகளை முதல்வர் மம்தா பானர்ஜி கடுமையாக தாக்கிப் பேசியுள்ளார். 

ஆங்கிலத்தில் படிக்கவும்: ‘Congress, CPI(M) not INDIA in Bengal…they are BJP agents,’ Mamata Banerjee hits out

மம்தா தாக்கு 

மேற்கு வங்கத்தில் ஆளும் மம்தா பானர்ஜி தலைமையிலான திரிணாமுல் காங்கிரஸ், அம்மாநிலத்தில் காங்கிரஸ் மற்றும் சி.பி.ஐ(எம்) கட்சிகளுக்கு ஆதரவளிக்கப் போவதில்லை என்றும், அக்கட்சிகள் பா.ஜ.க-வின் ஏஜெண்டுகள் என்றும் தெரிவித்துள்ளார். 

முர்ஷிதாபாத்தில் நடைபெற்ற பேரணியில் பேசிய முதல்வர் மம்தா பானர்ஜி, தேர்தலுக்கு முந்தைய கருத்துக் கணிப்புகள் அனைத்தும் போலியானவை என்றும், பா.ஜ.க 200 இடங்களுக்கு மேல் பெறாது என்றும்தெரிவித்தார். “சிலர் சொல்கிறார்கள், நாங்கள் இந்தியா கூட்டணியில் இருக்கிறோம்.  எங்களுக்கு வாக்களியுங்கள் என்று கூறுகிறார்கள். இந்தியா கூட்டணி மேற்கு வங்கத்தில் இல்லை. அந்த கூட்டணி டெல்லிக்கு சொந்தமானது.

இங்கு காங்கிரஸும் சி.பி.எம்-மும் இந்தியா கூட்டணி இல்லை. அவர்கள் பா.ஜ.க. அவர்களுக்கு ஒரு ஓட்டு என்பது பா.ஜ.க-வுக்கு இரண்டு ஓட்டு போடுவதற்கு சமம். அவர்களுக்கு ஒரு ஓட்டு கூட போடாதீர்கள். வரும் நாட்களில் எதிர்க்கட்சி கூட்டணியான இந்தியாவை நாங்கள் தான்  வழிநடத்துவோம். ஆனால், மேற்கு வங்கத்தில் சி.பி.ஐ (எம்) மற்றும் காங்கிரஸூம் பா.ஜ.க-வின் ஏஜெண்டுகள். எனவே நான் அவர்களை இங்கு ஆதரிக்க மாட்டேன். 

நாட்டில் பா.ஜ.க-வுக்கு 200 இடங்கள் கூட கிடைக்காது. அனைத்து ஆய்வுகளும் போலியானவை. கணக்கெடுப்பில் லட்சக்கணக்கான ரூபாய் கொட்டப்பட்டுள்ளது. அதைக் கேட்காதீர்கள். பா.ஜ.க வெற்றி பெறாது.”என்று அவர் கூறினார்.

ஆங்கிலத்தில் படிக்கவும்: ‘Two chief ministers are in jail, but not Pinarayi Vijayan?’: In Kerala, Rahul alleges CPM-BJP nexus

ராகுல் குற்றச்சாட்டு 

இதனிடையே, கேரளாவில் தேர்தல் பிரச்சாரத்தில் ஈடுபட்டு வரும் காங்கிரஸ் தலைவர் ராகுல் காந்தி, மத்தியில் ஆளும் பா.ஜ.க முதல்வர் பினராயி விஜயனின் சி.பி.ஐ (எம்) கட்சியை ஏன் தாக்கி பேசவில்லை என்று கேள்வி எழுப்பியுள்ளார். மேலும், பா.ஜ.க - சி.பி.ஐ (எம்) ஆகிய இரு கட்சிகளும் கள்ளக் கூட்டணியில் உள்ளன என்றும் அவர் குற்றம்சாட்டி இருக்கிறார். 

கண்ணூரில் தேர்தல் பிரசாரத்தில் கலந்து கொண்டு பேசிய ராகுல் காந்தி, “இரண்டு முதல்வர்கள் சிறையில் உள்ளனர். கேரள முதலமைச்சருக்கு அது நடக்காமல் போனது எப்படி? நான் பா.ஜ.க-வை வாரத்தில் 24 மணி நேரமும் தாக்கிப் பேசி வருகிறேன். ஆனால், கேரள முதல்வர் என்னை வாரத்தில் 24 மணி நேரமும் தாக்கிப் பேசி வருகிறார். இது சற்று குழப்பமாக உள்ளது.

பினராயி விஜயன் தான் கருத்தியல் ரீதியாக பா.ஜ.க-வை எதிர்த்துப் போராடுவதாகக் கூறுகிறார். ஆனால் நீங்கள் பா.ஜ.க-வுடன் சித்தாந்த ரீதியாக போராடும்போது, ​​அவர்கள் உங்களிடம் உள்ள அனைத்தையும் கொண்டு தாக்குகிறார்கள் என்பது எனக்குத் தெரியும். ஆனால், கேரள முதல்வர் மீது எந்த தாக்குதலும் இல்லை. இது கேரள மக்கள் சிந்திக்க வேண்டிய விஷயம்” என்று அவர் கூறினார்.

கடந்த மாதம் குடியுரிமை (திருத்த) சட்டத்திற்கான விதிகள் அறிவிக்கப்பட்ட பிறகும், ராகுல் அமைதியாக இருப்பதாக கேரள முதல்வர் விஜயன் குற்றம் சாட்டி இருந்தார். கடந்த புதன்கிழமை பாலக்காட்டில் அவர் பேசுகையில், “காங்கிரஸ், குறிப்பாக ராகுல், சி.ஏ.ஏ குறித்து மௌனமாக இருப்பது ஏன்? சி.ஏ.ஏ தொடர்பாக சங்க பரிவாரத்தின் அணுகுமுறை தங்களுக்கு உள்ளது என்பதை காங்கிரஸ் ஒப்புக்கொள்ள வேண்டும்." என்று அவர் கூறினார் என்பது குறிப்பிடத்தக்கது. 

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற  https://t.me/ietamil“