Ev Velu | Tiruvannamalai | Madras High Court | திருவண்ணாமலை மாவட்டத்தில் உள்ள மாத்தூரில் சரஸ்வதி அம்மாள் கல்வி அறக்கட்டளைக்கு சொந்தமான என்ஜினீயரிங் கல்லூரி ஒன்று உள்ளது.
இந்தக் கல்லூரியின் தலைவராக அமைச்சர் எ.வ.வேலுவின் மனைவி ஜீவா இருந்துவருகிறார். இந்த நிலையில், “இக்கல்லூரியானது அரசு புறம்போக்கு நிலம் மற்றும் நீர்நிலையை ஆக்கிரமித்து கட்டப்பட்டுள்ளது; ஆகவே அதன் உரிமத்தை ரத்து செய்ய வேண்டும்” என டி.எஸ். சங்கர் என்பவர் சென்னை உயர் நீதிமன்றத்தில் வழக்கு ஒன்றை தாக்கல் செய்தார்.

இந்த வழக்கு தலைமை நீதிபதி எஸ்.வி. கங்காபூர்வாலா மற்றும் நீதிபதி ஜெ.சத்தியநாராயண பிரசாத் அமர்வில் செவ்வாய்க்கிழமை (ஏப்.23,2024) அன்று விசாரணைக்கு வந்தது.
அப்போது, அமைச்சர் எ.வ வேலு தரப்பில் வழக்கறிஞர் வில்சன் ஆஜராகி வாதிட்டார். தனது வாதத்தின்போது, கல்லூரியானது அரசு புறம்போக்கு நிலத்தில் கட்டப்படவில்லை” என்றார்.

இந்த வாதத்தை ஏற்றுக்கொண்ட  மனுதாரர் தரப்பு வழக்கறிஞர், கல்லூரி 20 ஏக்கர் நிலத்தில் கட்டப்பட வேண்டும் என விதி மீறப்பட்டுள்ளது.
கல்லூரியானது 7 ஏக்கர் நிலத்தில்தான் கட்டப்பட்டுள்ளது என்றார். இரு தரப்பு வாதங்களையும் கேட்டுக்கொண்ட நீதிபதி, “இந்த விவகாரத்தில் அகில இந்திய தொழில்நுட்ப கல்விக் குழுமம் ( AICTE) தான் நடவடிக்கை எடுக்க முடியும்” எனக் கூறி வழக்கை முடித்துவைத்தனர்.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற  https://t.me/ietamil“

Bus | Madurai High Court | தமிழ்நாட்டில் உள்ள பள்ளிகளின் நேரத்தை கணக்கில் கொண்டு கூடுதல் பேருந்துகளை இயக்க வேண்டும் என்ற கோரிக்கை வலுப்பெற்று காணப்பட்டது.
இந்தப் பொது வெளியில் பதிவான கோரிக்கையை 2013ஆம் ஆண்டு உயர்நீதிமன்ற மதுரை கிளை தாமாக முன் வந்து விசாரணைக்கு எடுத்தது.

இந்த வழக்கின் விசாரணை மதுரை ஐகோர்ட் கிளையில் இன்று (ஏப்.23,2024) நடைபெற்றது. அப்போது, “தமிழ்நாட்டில் உள்ள அரசு மற்றும் தனியார் பேருந்துகளில் தானியங்கி கதவு பொருத்தப்பட்டு உள்ளன? எத்தனை பேருந்துகளில் தானியங்கி கதவு பொருத்தப்படாமல் உள்ளது? என கேள்வியெழுப்பப்பட்டது.

தொடர்ந்து, இது குறித்து தமிழ்நாடு உள் துறை செயலாளர்,  போக்குவரத்து துறை செயலாளர் உள்ளிட்டோர் பதில் மனு தாக்கல் செய்ய உயர்நீதிமன்ற கிளை உத்தரவிட்டது.
மேலும், “இளைஞர்களின் நலன் கருதி தமிழ்நாட்டில் அரசு,  தனியார் பேருந்துகளில் படிகட்டு பயணத்தை தவிர்க்கும் வகையில் அனைத்து பேருந்துகளின் படிகட்டுகளிலும் தானியங்கி கதவுகளை பொருத்த வேண்டும் எனவும் ஐகோர்ட் கேட்டுக்கொண்டது.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற  https://t.me/ietamil“

மதுரை சித்திரை திருவிழாவில், காவல்துறை சார்பில் பறக்கவிட்ட ட்ரோன் கேமராக்களை பிடிக்க முயன்ற இளைஞர்களுக்கு காவல்துறையினர் நூதன முறையில் தண்டனை அளித்த வீடியோ பதிவு இணையத்தில் வைரலாகி வருகிறது.

தமிழகத்தின் தென் பகுதியில் முக்கிய இடமாக இருக்கும் மதுரையில் ஆண்டுதோறும் சித்திரை திருவிழா விமர்சையாக கொண்டாடப்படுவது வழக்கம். இந்த திருவிழாவை பார்க்க தமிழகத்தின் பல்வேறு பகுதிகளில் இருந்து மட்டுமல்லாமல், வெளிநாடுகளில் இருந்து பக்தர்கள் வருவது உண்டு. இந்த சித்திரை திருவிழாவில் அழகர் ஆற்றில் இறங்கும் நிகழ்வு பெரும் விமர்சையாக கொண்டாடப்படும் ஒரு நிகழ்வாகும்.

அந்த வகையில் கடந்த இரு தினங்களுக்கு முன்பு மதுரையில் தொடங்கிய நடப்பு ஆண்டுக்கான சித்திரை திருவிழா கொண்டாட்டத்தில் இன்று அழகர் ஆற்றில் இறங்கும் நிகழ்வு நடைபெற்றது. இந்த நிகழ்ச்சியை பார்க்க லட்சக்கணக்கான பக்தர்கள் கூறியிருந்த நிலையில், நூற்றுக்கணக்கான போலீசார் பாதுகாப்பு பணியில் ஈடுபட்டிருந்தனர். அப்போது கண்காணிப்பு பணிக்காக காவல்துறை சார்பில் ட்ரோன்கள் பறக்கவிடப்பட்டுள்ளது.

வைகை ஆற்றில் கள்ளழகர் எழுந்தருளும் இடம் அருகே கூறியிருந்த சில இளைஞர்கள் காவல்துறையினரின் ட்ரோன் கேமராக்களை பிடிக்க முயன்றுள்ளனர். இதனை பார்த்த அங்கிருந்த காவல்துறையினர் அந்த இளைஞர்களை தனியாக அழைத்து தவளை போன்று குதிக்க சொல்லி நூதனமுறையில் தண்டனை கொடுத்துள்ளனர். இது தொடர்பான வீடியோ பதிவை புதிய தலைமுறை தனது எக்ஸ் பக்கத்தில் வெளியிட்டுள்ளது.

காவல்துறையின் ட்ரோன் கேமராவையே பிடிக்க முயன்ற இளைஞர்கள்... தவளை போல தவழச்சொல்லி நூதன தண்டனை!#Madurai | #VaigaiRiver | #Kallazhagar pic.twitter.com/JmH60nijMf

— PuthiyathalaimuraiTV (@PTTVOnlineNews) April 23, 2024

இந்த வீடியோ பதிவு இணையத்தில் வைரலாகி வரும் நிலையில், பலரும் காவல்துறையினரின் இந்த செயலுக்கு தங்கள் கருத்துக்களை தெரிவித்து வருகின்றனர்.

O Panneerselvam | Justice Anand Venkatesh: 2001 முதல் 2006 வரையிலான அ.தி.மு.க ஆட்சியில் வருவாய்த்துறை அமைச்சராக இருந்தபோது, ​​வருமானத்துக்கு அதிகமாக ரூ. 1.7 கோடி சொத்து குவித்ததாக முன்னாள் முதல்வர் ஓ.பன்னீர்செல்வம் உள்ளிட்டோர் மீது தி.மு.க ஆட்சியில் லஞ்ச ஒழிப்புத் துறை வழக்கு பதிவு செய்தது. 

2012-ல் அ.தி.மு.க மீண்டும் ஆட்சிக்கு வந்தபோது, இந்த சொத்து குவிப்பு வழக்கில் இருந்து ஓ.பன்னீர்செல்வம் உள்ளிட்டோரை சிவகங்கை நீதிமன்றம் விடுவித்தது. இந்த உத்தரவுக்கு எதிராக சென்னை உயர் நீதிமன்ற நீதிபதி ஆனந்த் வெங்கடேஷ் தாமாக முன்வந்து வழக்கை எடுத்தார். 

இதற்கு எதிராக ஓ.பி.எஸ் தரப்பு உச்ச நீதிமன்றத்தில் மனுத்தாக்கல் செய்தது. அதனை, கடந்த மார்ச் மாதம் உச்ச நீதிமன்றம் தள்ளுபடி செய்தது. கடந்த மார்ச் 26-ம் தேதி நடந்த வழக்கு விசாரணையில், அரசியல் கருத்து வேறுபாடு காரணமாக தமக்கு எதிராக வழக்குத் தொடரப்பட்டதாக ஓ.பி.எஸ் தரப்பு உயர்நீதிமன்றத்தில் வாதிட்டது. 

இந்நிலையில், இந்த வழக்கின் விசாரணை மீண்டும் நேற்று திங்கள்கிழமை நடைபெற்றது. அப்போது, குற்றம் சாட்டப்பட்ட  ஓ.பன்னீர்செல்வத்தின் சகோதரர் ஓ.ராஜா, அவரது மனைவி தரப்பில் மூத்த வக்கீல் சீனிவாசன் ஆஜராகி வாதிட்டார். அப்போது அவர், "சட்டப் பிரிவுகளின் கீழ் மேல் விசாரணைக்கு உத்தரவிட மாஜிஸ்திரேட்டுக்கு அதிகாரம் உள்ளது.

வழக்கு தொடர்வதற்கு ஏற்கனவே வழங்கிய அனுமதியை திரும்பப் பெற முடியும். விடுவிக்கக் கோரிய மனு மீது முடிவெடுக்க சிறப்பு நீதிமன்றங்கள் ஆதாரங்களை ஆய்வு செய்யத் தேவையில்லை. விடுவித்து பிறப்பிக்கப்படும் உத்தரவில் காரணங்களைத் தெரிவிக்க அவசியமும் இல்லை. சபாநாயகர், அரசு தலைமை வழக்கறிஞர், குற்றவியல் தலைமை வழக்கறிஞர் ஆகியோரின் ஆலோசனைகளைப் பெற்ற பிறகே வழக்கு தொடர அளித்த அனுமதியை திரும்பப் பெற அரசு முடிவு செய்துள்ளது.

2012-ல் ஓ.பன்னீர்செல்வம் உள்ளிட்டோரை விடுவித்து சிவகங்கை நீதிமன்றம், 11 ஆண்டுகளுக்கு முன் பிறப்பித்த உத்தரவை தற்போது மறு ஆய்வு செய்வதை தவிர்க்க வேண்டும். வழக்கில் குற்றம் சாட்டப்பட்ட இருவர் மரணமடைந்து விட்டனர். பல சாட்சிகளும் இறந்து விட்டனர். நீண்ட காலஇடைவெளிக்குப் பின்பு மீண்டும் விசாரணைக்கு எடுத்துக் கொள்ளப்பட்டுள்ளது. சிவகங்கை நீதிமன்ற உத்தரவில் தலையிடுவதை இந்த நீதிமன்றம் தவிர்க்க வேண்டும்" என்று வாதிட்டார். 

இதையடுத்து, லஞ்ச ஒழிப்புத் துறை வாதங்களுக்காக விசாரணையை நீதிபதி ஆனந்த் வெங்கடேஷ், வரும் 30ம் தேதிக்கு தள்ளிவைத்தார்.

அமைச்சர்கள் தங்கம் தென்னரசு, கே.கே.எஸ்.எஸ்.ஆர் ராமச்சந்திரன், ஐ.பெரியசாமிமற்றும் அ.தி.மு.க முன்னாள் அமைச்சர் பா.வளர்மதி ஆகியோருக்கு எதிரான சூமோட்டோ வழக்குகளுடன் ஓ.பன்னீர்செல்வத்தின் வழக்கும் விசாரணைக்கு வரவுள்ளது. 

அமைச்சர் பொன்முடி மீதான சூமோட்டோ வழக்கும் நேற்று விசாரணைக்கு வந்த நிலையில், அதனை ஜூன் 18 ஆம் தேதி முதல் 21 ஆம் தேதி வரை விசாரிக்கப்படும் என்று கூறி வழக்கை ஒத்தி வைத்தார் நீதிபதி ஆனந்த் வெங்கடேஷ்.  

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற  https://t.me/ietamil“

கோவை மாவட்டத்தில் மேற்கு தொடர்ச்சி மலையில் தென்கைலாயம் என அழைக்கப்படும் வெள்ளியங்கிரி கோவில் அமைந்து உள்ளது. ஏழு மலைகளை தாண்டி சுயம்பு வடிவில் இருக்க கூடிய சிவலிங்கத்தை தரிசிக்க ஆண்டு தோறும் லட்சக் கணக்கான பக்தர்கள் வருகை புரிந்து வருகின்றனர். பிப்ரவரி மாதம் முதல் மே மாதம் வரை பக்தர்கள் மலை ஏற அனுமதிக்கப்பட்டு வருகின்றனர். 

இந்த நிலையில் கடந்த 18 ம் தேதியன்று காலை திருப்பூர் எஸ்.வி. காலணி பகுதியைச் சேர்ந்த வீரக்குமார் என்ற 31 வயதான நபர், தனது நணபர்களுடன் வெள்ளியங்கிரி மலையேறி உள்ளார். ஏழு மலைகள் ஏறி சாமி தரிசனம் செய்து விட்டு கீழே இறங்கும் போது, ஏழாவது மலையில் இருந்து கீழே விழுந்து விட்டார். இதில் அவரது வயிறு மற்றும் காலில் காயம் ஏற்பட்டு உள்ளது. 

இதனைப் பார்த்த அவரது நண்பர்கள் வீரக்குமாரை மீட்டு கோவில் நிர்வாகத்திற்கும், வனத் துறையினருக்கும் தகவல் அளித்தனர். பின்னர் சுமை தூக்கும் பணியாளர்கள் அவரை மலையில் இருந்து கீழே கொண்டு வந்தனர். பின்னர் ஆம்புலன்ஸ் மூலம் பூலுவப்பட்டி அரசு ஆரம்ப சுகாதார நிலையத்தில் முதலுதவி சிகிச்சை அளிக்கப்பட்டது. 

பின்னர் வீரகுமார், கோவை அரசு மருத்துவமனைக்கு சிகிச்சைக்காக கொண்டு செல்லப்பட்டார். அங்கு சிகிச்சை அளிக்கப்பட்டு வந்த நிலையில், வீரக்குமார் சிகிச்சை பலனின்றி உயிரிழந்தார். இதனைத் தொடர்ந்து உடற் கூராய்விற்காக அரசு மருத்துவமனையில் அவரது உடல் வைக்கப்பட்டு உள்ளது. இந்த சம்பவம் குறித்து ஆலாந்துறை காவல் துறையினர் விசாரணை நடத்தி வருகின்றனர். 

வெள்ளியங்கிரி மலையேறிய மேலும் ஒரு பக்தர் உயிரிழந்த சம்பவம் சோகத்தை ஏற்படுத்தி உள்ளது.

“தமிழ் இந்தியன் எக்ஸ்பிரஸின் அனைத்து செய்திகளையும் உடனுக்குடன் டெலிகிராம் ஆப்பில் பெற https://t.me/ietamil“